Էնդի Ուորհոլի և Ժան Դյուբյուֆեի, Գերհարդ Ռիխտերի, Սեսիլ Բրաունի, Մարկ Քուինի, Ջուլիանա Շնավելի և այլ ժամանակակից հեղինակների գործերը վաճառքի կհանվեն Phillips-ի երկօրյա աճուրդում, որը տեղի կունենա Լոնդոնում փետրվարի 1-ին և 15-ին։ Այս մասին տեղեկացրել են աճուրդի կազմակերպիչները:
Phillips-ը համարվում է աշխարհի ամենաազդեցիկ աճուրդի տներից մեկը և մասնագիտանում է ժամանակակից արվեստի, լուսանկարների և թանկարժեք զարդերի վաճառքի գործում:
Ուորհոլի՝ աճուրդի հանված ստեղծագործություններից են՝ «Տոմատի հյութի տուփը» (գնահատվել է 200-300 հզ. ֆունտ սթեռլինգ), «Բրիլո փոշու տուփը» (600-800 հզ. ֆունտ սթեռլինգ) և «Մանգաղ ու մուրճ» մետաքսագրությունը (նախնական արժեքը՝ 200-300 հզ. ֆունտ սթեռլինգ):
Լոտերի թվում է նաև ֆրանսիացի նկարիչ-մոդեռնիստ Ժան Դյուբյուֆեի «Թափառող շունը» կտավը (1955 թ.), որը գնահատել են 400-600 հզ. ֆունտ:
Բրիտանացի նկարչուհի Սեսիլ Բրաունի «Էդեմից Արևելք»-ը՝ 1999 թ. գնահատվել է 600-800 հզ. ֆունտ:
Աճուրդին կներկայացվի նաև Մարկ Քուինի «Անհոգ ցանկություն» (2010) բրոնզե քանդակը: Լոտը գնահատել են 100-150 հզ. ֆունտ:
Փորձագետները նշում են նաև ամերիկացի Ռոբ Պրյուիտի «Պանդայի ուժը» աշխատանքը, որի նախանական գինը 60-80 հզ. ֆունտ է։
