Բարաք Օբամայի կողմից պաշտպանության նախարարի պաշտոնին նշանակված Չակ Հեյգելը նախօրեին հայտարարել էր, որ ԱՄՆ-ը հակված է խորացնել ռազմաքաղաքական համագործակցությունը Հայաստանի հետ: Սենատի զինված ուժերի հանձնաժողովի դեմոկրատ նախագահ Կարլ Լևինի հարցին՝ ի՞նչ է ինքը պատրաստվում անել` խորացնելու համար Վաշինգտոնի և Երևանի ռազմական կապերը, Հեյգելը պատասխանել է, որ պաշտպանական ոլորտում Հայաստանի և Միացյալ Նահանգների հարաբերությունները ամուր են, և ավելացրել է, որ առկա հարաբերությունների մակարդակը հաշվի առնելով` երկկողմ կապերի և գործընկերության ամրապնդման համար հեռանկարներ ևս առկա են:
Հայ դատի Վաշինգտոնի գրասենյակի գործադիր տնօրեն Արամ Համբարյանը «Առաջին լրատվական»-ի հետ զրույցում անդրադառնալով Չակ Հեյգելի հայտարարությանը՝ ասաց. «Հայաստանի և ԱՄՆ-ի կառավարությունների հանրային դիրքորոշումներին հավատարիմ մնալով՝ Հայ Դատի ամերիկյան հանձանխումբը աջակցում է պաշտպանության ոլորտում Հայաստան-ԱՄՆ երկկողմանի հարաբերությունների զարգացմանը»:
Չակ Հեյգելը նաև նշել է, որ եթե իր թեկնածությունը հաստատվի, նա կշարունակի քաջալերել Հայաստանի ղեկավարությանը, որպեսզի ամրապնդվի համագործակցությունն այն ոլորտներում, որոնցում այն արդեն առկա է:
