Թուրքիայի նախագահի մամլո քարտուղար Իբրահիմ Քալընը հերքել է երկրում Facebook-ը, Youtubе-ը և Twitter-ն արգելափակելու մասին տեղեկությունը, բայց նշել է, որ դատախազությունը ռեսուրսների վարչակազմերին հարկադրել է ջնջել դատախազ Սելիմ Քիրազին պատանդ վերցնելու հետ կապված ֆոտո- և տեսանյութերը: Այս մասին հայտնում է RIA Novosti-ն:
Երկուշաբթի օրն ավելի վաղ թուրքական ԶԼՄ-ները հայտնել են Թուրքիայի տարածքում այդ ռեսուրսների հասանելիության հետ կապված դժվարությունների մասին և դա կապել են իշխանությունների կողմից դրանց արգելափակման հետ:
«Որքան ես գիտեմ՝ դատախազությունը պահանջել է, որ այդ պատկերները չհրապարակվեն ԶԼՄ-ներում, բայց ռեսուրսների արգելափակման մասին խոսք առայժմ չկա»,- լրագրողներին ասել է Քալընը: Նա հավելել է, որ ամեն դեպքում պետք չէ դա դիտարկել որպես հանցափորձ խոսքի ազատության դեմ:
Անցած շաբաթ Թուրքիայի «Հեղափոխական ժողովրդա-ազատագրական կուսակցություն-ճակատ» (DHKP-C) ձախակենտրոն ծայրահեղական խմբավորման գրոհայինները Ստամբուլում պատանդ են վերցրել, հետո սպանել դատախազ Սելիմ Քիրազին: Երկու ահաբեկիչները ոչնչացվել են հատուկ գործողության ժամանակ: Գերու` ատրճանակը գլխին լուսանկարը տարածվել է սոցցանցերում և հրապարակվել է թուրքական որոշ ԶԼՄ-ների կողմից: Թուրքիայի վարչապետ Ահմեդ Դավութօղլուն դատապարտել է Քիրազի լուսանկարի հրապարակումը և հայտարարել, որ դա վիրավորում է դատախազի հարազատների զգացմունքները:
