«Հիմնական նպատակը պետք է լինի Հայաստանի մրցակցային դիրքի բարելավումը: Իմ խորին համոզմամբ, արտարժութային որևէ ինտերվենցիա չպետք է իրականացվի»,- «Առաջին լրատվականի» հետ զրույցում ասաց ԿԲ նախկին նախագահ Բագրատ Ասատրյանը`անդրադառնալով միջազգային արտարժութային շուկաներում ստեղծված իրավիճակին և այդ իրավիճակում Հայաստանի դրամավարկային իշխանությունների անելիքներին: «Ճիշտ հակառակը, երկիրը ունի հսկայական արտաքին պարտք, արտաքին պարտքի սպասարկման խնդիր, և երկրի արտարժութային պահուստների ավելացման խնդիր պետք է այսօր դրվի: Այսինքն` այո, գիտակցելով, որ գնաճային ֆոնը բավականին բարդ է, պետք է հստակ ասել, որ այս գործիքը գնաճի կանխարգելման կամ զսպման միջոց չի հանդիսանալու: Ընդհակառակը, մենք պետք է նկատի ունենանք, որ այս գործիքը՝ արտարժութային ինտերվենցիաները, ավելի շատ գնաճի մեծացման ուղղությամբ ազդող հանգամանք կարող է լինել: Այս պարագայում գնաճի դեմ առնելու համար պետք է գործի դրվեն ուրիշ միջոցներ, այդ թվում նաև` կառավարության համապատասխան քաղաքականությունը: