Աբովյանի քաղաքապետի ընտրությունները խոստանում են բավական ինտրիգային լինել, քանի որ այդ պաշտոնին հավակնողների թիվը գնալով մեծանում է:
Երեկ մենք արդեն իսկ գրել էինք, որ ամենահավանական թեկնածուն, որ մեզ հետ զրույցում չէր թաքցրել առաջադրվելու իր ցանկությունը, «Քինգ դե լյուքս» ընկերության սեփականատեր Արթուր Հարությունյանն է՝ Պալաչ մականունով:
Ըստ շրջանառվող լուրերի՝ թեկնածուների շարքում է լինելու նաև Աբովյանի քաղաքապետի տեղակալ Անդրանիկ Պետրոսյանը, ով Կարապետ Գուլոյանի մարզպետ նշանակվելուց հետո դառնալու է քաղաքապետի ժամանակավոր պաշտոնակատարը: Նշենք, որ Պետրոսյանը ընդամենը 10 օր առաջ էր նշանակվել քաղաքապետի տեղակալ: Նա ԲՀԿ-ական է և համարվում է Գուլոյանի «մարդը»: Դրան զուգահեռ՝ կարծիք կա, որ Պետրոսյանի առաջադրմամբ շահագրգռված է վարչապետ Հովիկ Աբրահամյանը՝ Աբովյանում ԲՀԿ-ի իշխանությունը պահպանելու տեսանկյունից:
«Առաջին լրատվական»-ի տեղեկություններով՝ Աբովյանի քաղաքապետի պաշտոնի հավակնորդներից է նաև ԱԺ ԲՀԿ խմբակցության անդամ Մելիք Մանուկյանի (Շշերի Մելո) եղբայրը՝ Վարդան Մանուկյանը, ով նույնպես ԲՀԿ-ական է և մի շարք բիզնեսների սեփականատեր: Հենց նրան է պատկանում Աբովյան-Արզնի խճուղու վրա գտնվող «Պարտեզ» ռեստորանային համալիրը: Բացի այդ, նա հանդիսանում է եղբոր՝ «Սարանիստ» շշերի գործարանի գլխավոր տնօրենը ու Գուլոյանի մտերիմներից: Մանուկյանը, սակայն, չի շտապում վերջնական որոշում կայացնել:
Քաղաքապետի պաշտոնի բոլոր հավակնորդներն էլ սպասում են ՀՀԿ-ի որոշմանը. կախված նրանից, թե Հանրապետական կուսակցությունն ում կառաջադրի քաղաքապետի պաշտոնում, ըստ այդմ էլ ավելի հստակ կդառնան իրենց անելիքները: Առայժմ խոսվում է, որ ՀՀԿ-ն կառաջադրի հենց Արթուր Հարությունյանին: Սակայն, միևնույն ժամանակ, եթե հաշվի առնենք, որ Սերժ Սարգսյանը մարզը նվիրել է Գագիկ Ծառուկյանին, չի բացառվում, որ հենց Վարդան Մանուկյանը դառնա հիմնական թեկնածուն:
Լուսանկարը՝ Photolure-ի
