Հյուսիսային Կիպրոսի ինքնահռչակ թուրքական հանրապետության տարածքում գտնվող, ամբողջական ոչնչացման եզրին կանգնած Սուրբ Մակար հայկական եկեղեցին վերականգնելու համար անհրաժեշտ ֆինանսական միջոցներ թուրքական իշխանությունները չունեն։ Այս մասին հայտնում է «Հավադիս» թերթը։
Ղպտիների կողմից ավելի քան 1000 տարի առաջ կառուցված վանական այս համալիրն այսօր անուշադրության է մատնված։ Եկեղեցու շրջակայքը վերածվել է աղբանոցի, այստեղ երիտասարդները հավաքվում, խնջույքներ են կազմակերպում՝ աղտոտելով վանքի տարածքը։
Թեև ամեն օր տասնյակ զբոսաշրջիկներ են այցելում Մակարավանք, հայկական սրբատեղին, այնուամենայնիվ, թողնվել է բախտի քմահաճույքին։ Տեղական իշխանությունները, խոսելով համալիրի վերականգնման խնդրի մասին, պատճառաբանում են, թե դրա համար բավականին մեծ գումարներ են անհրաժեշտ, ինչն իրենք չունեն։
Հիշեցնենք, որ վանքը հիմնադրվել է ի հիշատակ Եգիպտոսում ապրած Սուրբ Մակարիոս Ալեքսանդրիացու։ 1425 թվականին այն տրվել է հայկական եկեղեցու տնօրինությանը՝ հայերի համար դառնալով Երուսաղեմի ճանապարհին հայտնի ուխտատեղի։
Թուրքիան 1974 թվականից բռնազավթել է Կիպրոսի հյուսիսային հատվածը, որը ստացել է «Հյուսիսային Կիպրոսի Թուրքական Հանրապետություն» անվանումը, իսկ այն որպես անկախ պետություն ճանաչված է միայն Անկարայի կողմից։ Ներկայում Թուրքիան Կիպրոսի հյուսիսում պահում է մեծաքանակ զինված ուժեր, որոնք թեև պայմանականորեն պատկանում են ՀԿԹՀ-ին, սակայն իրականում հենց Թուրքիայի զինված ուժերի մի մասն են։
