Հայաստանում գտնվող Ռուսաստանի Պետդումայի նախագահ Սերգեյ Նարիշկինը այսօր խորհրդարանում հանդես է եկել ելույթով՝ փորձելով հայ պատգամավորներին և նախարարներին զգուշացնել, թե ինչ սպառնալիքների կամ վտանգների կարող է ենթարկվել Հայաստանը, եթե շարունակի եվրաինտեգրացիային ուղղված իր քաղաքականությունը: Ի դեպ՝ Նարիշկինի ելույթի ժամանակ դահլիճում էր նաև վարչապետ Հովիկ Աբրահամյանը:
Իսկ ինչ է ասում Ռուսաստանի խորհրդարանի նախագահը: Նա հիշեցնում է, որ դեռևս Ֆրանսիայի նախագահ Շառլ դը Գոլն է երազել Լիսաբոնից մինչև Վլադիվոստոկ միասնական եվրասիական տնտեսական տարածք ստեղծելու մասին, բայց քանի որ ԱՄՆ-ին այդ գաղափարի իրականացումը դուր չի գալիս և հակասում է այդ երկրի շահերին, դրա համար էլ ամերիկացիները թույլ չտվեցին որպեսզի Եվրոպան միանա այդ ծրագրի իրականացմանը: Սակայն եթե Եվրոպան բավարար ինքնիշխանություն չունի իր շահերը պաշտպանելու համար, Ռուսաստանը միասնական տնտեսական տարածք է ստեղծում ավելի մեծ ինքնիշխանությամբ օժտված Ասիայի և Հարավարևելյան Ասիայի երկրների հետ. մի տնտեսական տարածք, որը ձգվելու է Մուրմանսկից մինչև Շանհայ, Դելիից մինչև Հանոյ: Այսպիսով Նաիրշկինը հայ պատգամավորներին բացատրում է, թե որտեղ է Երևանի տեղը, որ աշխարհագրական և աշխարհաքաղաքական տարածքում է լինելու Հայաստանը:
Իսկ եթե Հայաստանը ավելի պարզ պատկերացնի, թե ինչ է սպասում իրեն, եթե այնուամենայնիվ որոշի շարունակել «և-և» ի քաղաքականությունը ու Եվրասիական տնտեսական միությունից բացի՝ փորձի հարաբերություններ զարգացնել ԵՄ-ի հետ, Նարիշկինը մի խոսուն օրինակ բերեց: Նա հայտարարեց, որ արևմտյան պատժամիջոցներից առավել շատ տուժեցին այն երկրները, որոնք ընտրել էին եվրոասոցացման ճանապարհը և ԵՄ-ի հետ ասոցացման համաձայնագիր էին ստորագրել: «Պատժամիջոցներից առավել շատ տուժեցին եվրոասոցացման համաձայնագիր ստորագրած Ուկրաինան և Մոլդովան»,- հայտարարեց Սերգեյ Նարիշկինը:
Դժվար է ասել՝ արդյոք նա Վրաստանին զուտ պատահականորե՞ն մոռացավ, թե՞ այնուամենայնիվ Ռուսաստանում հույս ունեն, որ եվրոասոցացման համաձայնագիր ստորագրած Վրաստանը կփոխի իր արտաքին քաղաքականությունը և կհրաժարվի եվրոասոցացումից: Այս բացթողումը կարող է պատահականություն չլինել, եթե նկատի ունենանք, որ Վրաստանի ընդդիմությունը ևս իշխանություններին մեղադրում է եվրոատլանտյան ուղուց դեպի Ռուսաստան շեղվելու մեջ:
Ինչ վերաբերում է Հայաստանին, ապա Նարիշկինի այս հայտարարությունը ուղղակի ցուցում էր այն մարդկանց, ովքեր համարում են, որ Հայաստանը կարող է շարունակել «և-և»-ի քաղաքականությունը և կարող է եվրոասոցացման համաձայնագիր ստորագրել: «Եթե ուզում եք ասոցացման համաձայնագիր ստորագրել, ուրեմն նկատի ունեցեք, որ դուք ևս լինելու եք պատժամիջոցներից ամենաշատ տուժած երկրների ցանկում»,-մոտավորապես այսպիսին էր Նարիշկինի հաթաթան՝ ուղղված հայ պատգամավորներին և գործադիր իշխանության ԱԺ դահլիճում նստած ներկայացոցիչներին:
Բնականաբար, Նարիշկինը նկատի չուներ արևմտյան պատժամիջոցները որոնք ուղղված են Ռուսաստանի դեմ, այլ ընդհակառակը՝ ի պատասխան այդ պատժամիջոցների Ռուսաստանի կիրառած առևտրային սահմանափակումները: Ռուսաստանը սահմանափակել է Ուկրաինայից և Մոլդովայից ապրանքների ներմուծումը: Եթե Հայաստանը եվրոասոցացիայի համաձայնագիր ստորագրի, ապա չնայած ԵՏՄ անդամակցությանը՝ այդ նույն պատժամիջոցները կկիրառվեն Հայաստանի նկատմամբ:
Հաջորդը, որի մասին խոսեց Սերգեյ Նարիշկինը, ԵՏՄ տարածքում միասնական արժույթի ներդրումն է: Ըստ նրա վերջին մեկ տարվա ընթացքում դոլարի փոխարժեքի տատանումները ցույց տվեցին, որ ԵՏՄ տարածքում պետք է ունենալ միասնական արժույթ, ինչի միջոցով հնարավոր կլինի ավելի արդյունավետ դիմակայել հնարավոր ցնցումներին:
Հայ պաշտոնյաները մինչ այդ հայտարարում էին, որ միասնական արժույթի գաղափարի իրականացումը դեռ հասունացած չէ, որ դեռ երկար ճանապարհ պետք է անցնել դրան հասնելու համար: Եվ ահա, Նարիշկինն ասում է, որ որոշումն ընդունված է, և հայ պաշտոնյաների կարծիքը ոչ մի ազդեցություն չի կարող ունենալ այդ որոշման իրականացման վրա:
Բնականաբար, որևէ հայ պատգամավոր կամ պաշտոնյա չհակադարձեց Նարիշկինին, որևէ մեկը չասաց, թե՝ գիտեք, մենք շարունակելու ենք եվրոասոցացման մեր քաղաքականությունը և չենք պատրաստվում հրաժարվել մեր ազգային արժույթից: Նման բան սպասելն անգամ միամտություն կլինի, քանի որ բոլոր ներկաները հասկանում են, որ վերադասի որոշումները անքննելի են և ենթակա են անխոս կատարման:
