Լրագրողների հետ այսօր կայացած հանդիպման ժամանակ երգչուհի, «Միրայֆ» (MIRAIF) ջազ բենդի մենակատար, ռուսական «Գոլոս» մրցույթի մասնակից Մարիամ Մերաբովան անդրադարձավ նաև այդ մրցույթին:
Լրագրողներին հետաքրքրում էր մրցույթի հետ կապված ամեն ինչ՝ սկսած ընտրության կարգից մինչև Մարիամ Մերաբովայի կողմից ընտրված ուսուցիչը՝ Լեոնիդ Ագուտինը:
Երգչուհին երախտիքի խոսքեր շռայլեց ռուս երգչի հասցեին: «Ագուտինը մեծ ընկեր է, ու ես նրան անչափ շնորհակալ եմ: Իմ բախտը բերեց ուսուցչիս հարցում: Ես կրկին համոզվեցի, որ ճիշտ էի` նրան ընտրելով: Նա ոչ միայն մեծ փորձ ունեցող մարդ է: Սակայն նա իր փորձն ուներ, ես՝ իմը: Ագուտինի թիմը շատ ուժեղ էր: Ես իսկապես ուժեղագույն թիմի կազմում էի, պայքարն էլ կատաղի էր: Նա մինչև վերջ չէր բացահայտում իր խաղադրույքները: Նա բոլորիս միանման սիրում էր, հարգում: Կարող եմ ասել՝ նա ինձ շատ է օգնել»,- անկեղծացավ Մերաբովան:
Նա կատակով նշեց, որ մրցույթին մի քանի հայի մասնակցության պատճառով այն սկսել էին կատակով անվանել «Հայկական Գոլոս»:
Երգչուհու խոսքով՝ մինչ «Գոլոս»-ը իրեն շատերը գիտեին ավելի շատ որպես «ռիթմ էնդ բլյուզ»-ի երգչուհի ու իրեն այդքան էլ չէին ճանաչում: «Գիտեին միայն նրանք, ովքեր գալիս էին մեր համերգին»,- ասաց երգչուհին:
Մերաբովայի խոսքով՝ ինքը շատ է հուզվել մրցույթի ժամանակ, քանի որ դա եղել է իր առաջին վոլկալային մրցույթը: «Դա ամենալավ մրցույթներից էր, բայց ես սարսափելի վախենում էի: Պատասխանատվությունն ամեն անգամ մեծանում էր: Սա միանգամայն ազնիվ մրցույթ էր»,- ասաց երգչուհին:
