Apple-ը մտադիր է դառնալ էլեկտրոնիկայի շուկայում հերթական ոլորտի առաջատարը: Կալիֆոռնիական ընկերությունը փորձում է իր iPod-ի և iPhone-ի հաջողությունը կրկնել «խելացի» ժամացույցների պարագայում: Ընկերության ծրագրերի մասին գրում է The New York Times-ի տեսաբան Նիք Բիլթոնը, որը ավելի վաղ առաջիններից մեկն էր, որը մինչ պաշտոնական ներկայացումը գրել էր Google Glass «խելացի» ակնոցների մասին:
Թղթակցի անանուն աղբյուրները հայտնում են, որ ժամացույցի կորպուսը լիովին կամ մասնակի պատրաստված կլինի ճկուն ապակուց: Հենց դրանով էլ այն կտարբերվի մրցակիցներից: Այլ աղբյուրներ վստահեցնում են, որ այն պարզապես էլեկտրոնային խաղ չի լինի: Սարքը կաշխատի iOS օպերացիոն համակարգով, այսինքն՝ տեսականորեն դրանցում կարելի է գործարկել այն նույն հավելվածները, որոնցից հնարավոր է օգտվել iPhone-ի և iPad-ի միջոցով:
Apple-ը հրաժարվել է մեկնաբանություններից: Սարքի արժեքի և տեխնիկական առանձնահատկությունների մասին ոչինչ հայտնի չէ:
Apple-ի ծրագրերի մասին հայտնել է նաև The Wall Street Journal-ը՝ գրելով, որ Թիմ Կուկի ընկերությունը քննարկում է իր ասիական խոշոր գործընկերոջ՝ Hon Hai Precision Industry Co.-ի հետ (Foxconn-ի մայր ընկերությունը) գաջեթի արտադրության նախապատրաստությունները:
