Անգլիկանյան միության ղեկավար, Քենթերբերիի արքեպիսկոպոս Ջասթին Ուելբին կաթոլիկ եպիսկոպոսներից հետո քննադատել է երեքշաբթի օրը Համայնքների պալատի կողմից ընդունված Անգլիայում և Ուելսում միասեռ ամուսնությունների ինստիտուտի ներդրման կառավարական օրինագիծը: Այս մասին շաբաթ օրը տեղեկացրել է Վատիկանի ռադիոն:
«Անգլիկանյան եկեղեցու համար ամուսնությունը միշտ կնշանակի տղամարդու և կնոջ միությունը»,-հայտարարել է Ուելբին:
Այժմ օրինագիծը կքննարկվի Լորդերի պալատում: Դրա կազմի մեջ են մտնում նաև շատ անգլիականյան եպիսկոպոսներ: Քենթերբերիի արքեպիսկոպոսը խոստացել է աջակցել բոլոր նրանց, ովքեր պաշտպանում են ավանդական ամուսնությունները:
Ինչպես հայտնի է դարձել Վատիկանի ռադիոյից, մոտակա ժամանակներս տեղի կունենա անգլիկանյան և կաթոլիկ եպիսկոպոսների աշխատանքային հանդիպումը, որը նվիրված կլինի Բրիտանիայում միասեռ ամուսնությունների օրինականացման դեմ տարվող ռազմավարությանը:
Միասեռ զույգերի ամուսնության մասին օրենքի ընդունումը հոմոսեքսուալ զույգերին թույլ կտա ամուսնանալ ոչ միայն քաղաքացիական, այլև եկեղեցական ծիսակարգերով: Ընդ որում` եկեղեցական ծիսակարգերը չեն կարող կատարվել անգլիկանյան եկեղեցիներում, իսկ այլ եկեղեցիների ծառայողները կարող են վարվել ըստ իրենց հայեցողության:
