Օրեր առաջ տեղեկացրել էինք, որ «Նուբարաշեն» ՔԿՀ-ում գտնվող ՀԱԿ ակտիվիստ Տիգրան Առաքելյանի խցակիցը՝ 20-ամյա Սերոբ Մխիթարյանը, փորձել էր ինքնասպանություն գործել:
Երիտասարդն իր հանդեպ սահմանված պատիժը չի ընդունում, ինչի պատճառով էլ, ծնողների հավաստմամբ, հայտնվել է հոգեկան շատ ծանր իրավիճակում:
ԶԼՄ-ներում նրա ինքնասպանության փորձը մեծ աղմուկ բարձրացրեց, ինչից հետո գործին միջամտեց Հելսինկյան ասոցիացիայի Վանաձորի գրասենյակի ղեկավար, իրավապաշտպան Արթուր Սաքունցը՝ Սերոբ Մխիթարյանին տրամադրելով փաստաբան:
Նշենք նաև, որ երիտասարդի՝ գողության գործով երկրորդ դատավարությունը տեղի կունենա փետրվարի 14-ին: Գողությունը Ս. Մխիթարյանն իր վրա էր վերցրել Շուշիի բանտի անմարդկային պայմաններից խույս տալու և Հայաստան տեղափոխվելու համար։ Առաջին դատական նիստը նշանակված էր փետրվարի 1-ին, դատարանը փաստաբան Մուշեղ Շուշանյանին երկու շաբաթ ժամանակ է տրամադրել՝ գործի մանրամասներին ծանոթանալու համար:
Թեև Սերոբ Մխիթարյանն Արթուր Սաքունցի միջոցով մեզ էր փոխանցել իր հետ կատարված դեպքի բոլոր մանրամասները՝ գրավոր տարբերակով,այդուհանդերձ «Առաջին լրատվական»-ի տեղեկություններով՝ դատապարտյալն ինքնասպանության փորձից առաջ նամակ է գրել, որը հետագայում անհետացել է: Մեր տեղեկությունը ճշտելու համար խոսեցինք քրեակատարողական վարչության հասարակայնության հետ կապերի պատասխանատու Գոռ Ղլեչյանի հետ, ով հերքեց նման նամակի առկայությունը՝ ասելով, թե Սերոբ Մխիթարյանն ինքնասպանության փորձից առաջ ոչ մի նամակ չի թողել:
Նշենք, որ Սերոբ Մխիթարյանի ծնողները՝ Մարիետա Գոքորյանը և Քերոբ Մխիթարյանը, նախկինում «Առաջին լրատվական»-ի հետ զրույցում ասել էին, որ իրենց որդին այժմ բանտում է գտնվում մեկ ուրիշի՝ Անդրանիկ Գաբրիելյանի փոխարեն, ում հայրը Ղարաբաղի քննիչ Իգոր Ալավերդյանի ընկերն է, և ըստ ծնողների՝ հենց հայրն է իր ընկերոջը հորդորել որդու հանցանքը բարդել Սերոբ Մխիթարյանի վրա:
Ծնողները մեղադրում են նաև քննիչ Արտակ Իսկանդարյանին, ով, նրանց հավաստիացմամբ, իր վրա փակ գործ չթողնելու համար ուզում է երկրորդ գողությունը Սերոբի վրա բարդել: Հիշեցնենք նաև, որ Սերոբի հոգեկան վիճակը վատացել էր հատկապես այն բանից հետո, երբ Ա. Իսկանդարյանն այցելել էր դատապարտյալին՝ տեղեկացնելով, որ նրա հանդեպ նոր քրեական գործ է հարուցվել:
Թե ինչ կարող էր գրված լինել նամակում, թողնում ենք ընթերցողի դատին։ Մեր աղբյուրների համաձայն՝ նամակը եղել է կախվելու միջոցով ինքնասպանության փորձ կատարած 20-ամյա Սերոբ Մխիթարյանի գրպանում:
