Լևոն Տեր-Պետրոսյանի հարցազրույցն ընդհանուր ուղերձային է, ծրագրային չէ: Այսօր «Առաջին լրատվական»-ի հետ զրույցում այս մասին ասաց քաղաքական և ընտրական տեխնոլոգիաների փորձագետ Արմեն Բադալյանը՝ անդրադառնալով ՀՀ առաջին նախագահ Լևոն Տեր-Պետրոսյանի տված հարցազրույցին:
Ըստ Բադալյանի՝ խոսելով երկրում արտագաղթի մասին՝ նա ոչ թե հստակ նշում է, որ պետք է անել սա սա, սա կամ սա, այլ ուղղակի ընդհանուր նշում է, որ կա ավազակապետություն, պետական կառավարման ինստիտուտները չեն գտնվում բարձր մակարդակի վրա, մի խումբ մարդիկ ամեն ինչ իրենց ձեռքն են վերցրել, մենաշնորհել, ուստի եթե ուզում եք արտագաղթը դադարի, պետությունը ձախողված պետությունների շարքից դուրս գա, պետք է պայքարի դրանց դեմ:
«Նա անուղղակի դա նշում է, կոնկրետ հստակեցված չէ: Երբ կարդում ես ամբողջ հարցազրույցը, նկատում ես, որ ինքը նշում է պատճառները, ընդհանուր ուղերձային է հարցազրույցը, ծրագրային չէ, սակայն նշվում է, թե հիմնականում ինչ պետք է արվի արտագաղթը կասեցնելու համար: Դա ընդհանուր պայքարն է իշխանությունների դեմ»,- ասաց փորձագետը:
Հիշեցնենք, որ հարցազրույցում ՀՀ առաջին նախագահը նշել էր. «Եթե Սերժ Սարգսյանի նախագահական առաջին ժամկետում մեր երկրից արտագաղթել է տարեկան 50 հազար մարդ, ապա երկրորդ ժամկետում արտագաղթելու է արդեն տարեկան 100 հազար։ Այսպես շարունակվելու դեպքում Հայաստանը կանգնելու է դեմոգրաֆիական աղետի և պետականության կորստյան վտանգի առջև։ Բնակչության թվի շեշտակի նվազման հետևանքով տասը-քսան տարի հետո մեր երկիրը կորցնելու է իր պաշտպանունակությունը և կրկին հայտնվելու է 1920 թվականի երկընտրանքի առջև, այսինքն՝ վերջնական բնաջնջումից խուսափելու և ազգի գոյությունը մի կերպ ապահովելու համար սեփական իշխանությունների ձեռքով ինքնակամ հրաժարվելու է անկախությունից և, որպես դաշնության սուբյեկտ կամ ասոցացված անդամ, ուղղակի մտնելու է Ռուսաստանի կազմի մեջ»։
Լուսանկարը՝ PanARMENIAN Photo-ի
