Այսօր լրագրողների հետ հանդիպմանը ՀԱԿ-ի մաս կազմող ՍԴՀԿ անդամ Գուրգեն Եղիազարյանը, անդրադառնալով առաջին նախագահ Լևոն Տեր-Պետրոսյանի հայտարարությանը, թե՝ ժամանակն է, որ ՀԱԿ-ը դառնա կուսակցության, ասաց, որ, ամենայն հավանականությամբ, ՍԴՀԿ-ն այդ կուսակցությանը չի միանա:
«Ես չէի սպասում այս զարգացմանը: Մի նրբություն կա. ես ներկայացնում եմ ՍԴՀԿ-ն՝ դա մայր կուսակցություն է, և, բնականաբար, այն ոչ մի կուսակցության մեջ ձուլվել չի կարող: Մենք սոցիալ-դեմոկրատներ ենք և ՀԱԿ-ում համախմբվել ենք մի գաղափարի շուրջ ՝ վերացնել օլիգարխիկ համակարգը, քանդել ավազակապետությունը: Սակայն, ցավոք սրտի, դա մեզ չհաջողվեց՝ հինգ տարի պայքարելուց հետո ունեցանք ընդամենը 7 տեղ: Երևի եթե չպայքարեինք էլ, կունենայինք այդքան տեղ: Հաջորդ շաբաթ նիստ կլինի, և ես լիարժեք կպատասխանեմ, բայց, ամենայն հավանականությամբ, մենք չենք միանա ՀԱԿ կուսակցությանը»:
Գուրգեն Եղիազարյանը նշեց, որ հինգ տարվա ընթացքում Տեր-Պետրոսյանից շատ բան է սովորել, և ամեն դեպքում շնորհակալ է նրան. «Իմ ընկերներն ինձ ասում են, որ ՀՀՇ-ի ռեանիմացիայի համար է այս ամենն արվում, ես դեռ զերծ կմնամ այսօրինակ որակումներից և սուր քննադատություններից: Ասեմ, որ ՀԱԿ-ի ամենաարժանի մարդը Լևոն Տեր-Պետրոսյանն է»:
Լուսանկարը՝ PanARMENIAN Photo-ի
