Սահմանադրական բարեփոխումների հայեցակարգի շուրջ թվով 7 կուսակցությունների, ինչպես նաև Հանրային խորհրդի ներկայացուցիչների հետ հանդիպելու հետ մեկտեղ Սերժ Սարգսյանը հայտարարում է՝ սահմանադրական բարեփոխումների հայեցակարգը կդրվի հանրաքվեի, եթե դրա շուրջ լինի լայն կոնսոլիդացիա:
Հանդիպմանը մասնակցած ոչ բոլոր ուժերն են կողմ հայեցակարգին: Միևնույն ժամանակ, ներկայացրել են առաջարկներ, որոնք Սերժ Սարգսյանի համար քննարկման ենթակա են:
Հասարակական քաղաքական դաշտում մնում են տասնյակ կազմակերպություններ ու արտախորհրդարանական քաղաքական ուժեր, որոնք մինչ այժմ Սերժ Սարգսյանից հրավեր չեն ստացել: Օրինակ` «Քրիստոնեա-ժողովրդական վերածնունդ» կուսակցության նախագահ Սոս Գիմիշյանը, չնայած Սարգսյանի հետ հանդիպածների հասցեին հնչած քննադատություններին, պատրաստակամ է հանդիպել նախագահի հետ և ներկայացնել իր տեսակետները: «Առաջին լրատվական»-ի հետ զրույցում Գիմիշյանն անկեղծացավ, որ մինչ այժմ հրավեր չի ստացել. «Երևի չեն կարևորել, չգիտեմ, թե ինչու չեն հրավիրել: Ես տեսել եմ քաղաքական ուժեր, որ դեմ են հայեցակարգին, բայց նրանց հրավիրել են: Այնպես չէ, որ մենք կողմ ենք, բայց, իհարկե, քննարկմանը պատրաստ ենք, չենք մերժի: Կարևորում ենք մեր ասելիքը, ես մանրամասն ուսումնասիրել եմ: Իհարկե, կգնանք, կասենք մեր կարծիքը»,- ասաց նա:
Սահմանադրական բարեփոխումների հայեցակարգին կտրուկ դեմ է արտահայտվում «Հայրենիք և պատիվ» կուսակցությունը: «Առաջին լրատվական»-ի հետ զրույցում կուսակցության ղեկավար Գառնիկ Մարգարյանն ասաց, որ ո՛չ հրավեր են ստացել, ո՛չ էլ կողմ են նման «բարեփոխումներ» իրականացնելու: «Դա սահմանադրություն չէ, դա կապ չունի մեր երկրի, մեր ազգի, մեր անցյալի, ներկայի ու ապագայի հետ: Մենք Բաղրամյան 26-ում քննարկելու որևէ բան չունենք»,- ընդգծեց նա:
«Ժողովրդական հայրենիք» կուսակցության նախագահ Պետրոս Մակեյանն էլ մեզ հետ զրույցում ասաց, որ սահմանադրական բարեփոխումների հայեցակարգը կքննարկեն իրենց կուսակցության քաղխորհրդի նիստում միայն: «Ես չեմ կարծում, որ մեր կուսակցության քաղաքական խորհրդի անդամներն այն աստիճան են կորցրել արժանապատվությունը, որ գնան մի տեղ, որտեղի ղեկավարի անմիջական հրահանգով տարիներ շարունակ հալածանքների են ենթարկվել»,- եզրափակեց նա:
