Անշարժ գույքի բրիտանական շուկան, մասնավորապես՝ մայրաքաղաքայինը, դարձել է ողջ աշխարհում կոռուպցիոն ճանապարհով ստացված կապիտալի ապաստարան։ Այս մասին ասվում է Transparency International միջազգային ոչ կառավարական կազմակերպության զեկույցում՝ փոխանցում է TASS գործակալությունը։
Հետազոտության հեղինակները պարզել են, որ Լոնդոնում ներկայում 5.8 քառակուսի կմ ընդհանուր մակերեսով 36.342 շենքեր և բնակարաններ գտնվում են ընկերությունների տիրապետության տակ, որոնք օֆշորային գոտիներում գրանցված են անանուն սեփականատերերի վրա։
Կազմակերպությունը կարծում է, որ բրիտանական օրենքները նպաստում են արտերկրից ապօրինաբար ստացված միջոցների ներգրավմանը։
Կազմակերպությունը բրիտանական կառավարությանը առաջարկում է սահմանել նոր նորմ, որը կարգելի գրանցել անշարժ գույքը օֆշորային ընկերությունների վրա և կպահանջի նշել իրական սեփականատիրոջ անունը։
Զեկույցի համաձայն՝ կենտրոնական լոնդոնյան Վեսթմինսթեր շրջանում անշարժ գույքի 9.3 տոկոսը գրանցված է օֆշորային ընկերությունների վրա, Քենսինգթոն և Չելսի հեղինակավոր շրջանում նման գույքի մասնաբաժինը կազմում է 7.5 տոկոս, իսկ լոնդոնյան Սիթի գործարար շրջանում՝ 4.5 տոկոս։
