Այսօր ԱԺ պետաիրավական հարցերի հանձնաժողովը քննարկեց ՀԱԿ խմբակցության անդամ Նիկոլ Փաշինյանի ներկայացրած «ՀՀ նախագահի պաշտոնը զբաղեցնող Սերժ Սարգսյանին պաշտոնանկ անելու մասին» ԱԺ որոշման նախագիծը: Նախագիծը հանձնաժողովում մերժվեց, և այն բացասական եզրակացությամբ կներկայացվի ԱԺ քառօրյա: Նախագիծը մեկ անգամ էլ քվեարկության կդրվի խորհրդարանի լիագումար նիստում, և պատգամավորները քվեարկությամբ կորոշեն մտնի այն խորհրդարանի օրակարգ թե ոչ:
Կարելի է չկասկածել, որ նույն պատկերը լինելու է նաև խորհրդարանում, և դրա մասին Նիկոլ Փաշինայանը չէր կարող չիմանալ: Բայց եթե նա գիտի, որ իր ներկայացրած որոշման նախագիծը մերժվելու է, հարց է առաջանում, թե ինչու է նա նման նախագիծ ներկայացնում, կամ ինչ խնդիր է լուծում նման նախագիծ ներկայացնելով:
Նիկոլ Փաշինյանի նախագծի նպատակը ձևակերպեց հանձնաժողովի նիստին մասնակցող «Ժառանգություն» խմբակցության անդամ Զարուհի Փաստանջյանը: Նա հայտարարեց, որ այս նախագիծը կարելի էր խորհրդարանում քննարկել, եթե լիներ քաղաքական ուժերի աջակցությունը: Հասկանալի է, որ Փոստանջյանը նկատի չուներ ՀՀԿ-ին, որը չէր կարող պաշտպանել իր նախագահի պաշտոնանկության վերաբերյալ որոշման նախագիծը: Փոստանջյանի ակնարկը վերաբերում էր խորհդարանական մյուս խմբակցություններին, որոնց ներկայացուցիչները կա’մ բացակայում էին հանձնաժողովի նիստից, կամ էլ, ինչպես ՀԱԿ խմբակցության ղեկավար Գագիկ Ջհանգիրյանը հայտարարեց, որոշման նախագիծը իրավաբանական առումով անգրագիտություն է, և այդ պատճառով ինքը չի կարող կողմ քվեարկել այդ նախագծին:
Պետաիրավական հարցերի հանձնաժողովուի այսօրվա նիստից բացակայում էին հանձնաժողովի փոխնախագահ` ՕԵԿ-ական Հովհաննես Մարգարյանը, ՀՅԴ ներկայացուցիչ Արծվիկ Մինասյանը, ԲՀԿ խմբակցությունից` Տիգրան Ուրիխանյանը: Նրանց բացակայության պատճառով անհայտ մնաց, թե այս կուսակցությունները ինչ դիրքորոշում ունեն Նկոլ Փաշինյանի նախագծի վերաբերյալ:
Հույս ունենանք, որ երկուշաբթի օրը, երբ որոշման նախագիծը ԱԺ մտնելու հարցը կդրվի քվեարկության, հնարավորություն կունենաք այդ ժամանակ իմանալու, թե սույն խորհրդարանական խմբակցությունները ի վերջո կո՞ղմ են, թե՞ դեմ Սերժ Սարգսյանի պաշտոնանկությանը, և արդյոք ընդդիմադիր լինելու իրենց հայտարարությունների մեջ անկեղծ են: Չնայած` չի բացառվում, որ նույն պատկերը լինի նաև խորհրդարանի լիագումար նիստում, և այս կուսակցությունները իրենց դիրքորոշումը քողարկելու համար որոշեն ներկա չլինել խորհրդարանի լիագումար նիստին:
Բայց նույնիսկ այդ բացակայությունը ցույց է տալիս, որ խորհրդարանի ընդդիմադիր խմբակցությունները չեն ցանկանում կամ ավելի ճիշտ` այդքան համարձակություն չունեն կողմ քվեարկելու մի նախագծի, որում խոսվում է Սերժ Սարգսյանի պաշտոնանկության մասին:
Նիկոլ Փաշինյանը հայտարարում է, որ իր նպատակը նոր որակի, ինստիտուցոնալ ընդդիմության ստեղծումն է, որն այլևս չի խաբի հասարակությանը, որը հրապարակում չի հավաքի հարյուր հազարավոր մարդկանց և հերթական անգամ հուսախաբ չի անի մարդկանց: Իր նպատակն է ստեղծել մի ընդդիմություն, որը երբ կհայտարարի իշխանափոխության գործընթաց սկսելու մասին և մարդկանց կկանչի Ազատության հրապարակ, մարդիկ կիմանան, որ գործընթացը սկսված է, և կիմանան, երբ կավարտվի:
Նիկոլ Փաշինյանի նախագիծը կոչված է ցույց տալու, որ Հայաստանում գործող ընդդիմությունը կեղծ է, և այն չի կարող լուծել իշխանափոխության խնդիրը: Փաշինյանն իր այս քայլով տեղ է ազատում իր հայտարարած նոր և ինստիտուցիոնալ ընդդիմության համար: Բայց հասարակությունը դրա մասին իմացավ նաև առանց այս նախագծի, երբ իշխանափոխության նպատակով համախմբված ուժերը հայտարարեցին, որ մտադիր չեն անցկացնել իրենց իսկ կողմից հրավիրված հանրահավաքը:
Լուսանկարը` PAN Photo-ի
