«Ամերիաբանկ»-ի համար անցած տարին բավականին հաջող է եղել, և բանկային համակարգի միջին ցուցանիշների համեմատ բանկն ունեցել է ավելի լավ տվյալներ: Ինչպես այսօր լրագրողների հետ հանդիպման ժամանակ ներկայացրեց «Ամերիաբանկ»-ի ֆինանսական տնօրեն Գևորգ Թառումյանը, ընդհանուր բանկային համակարգի շահույթը նվազել է, մինչդեռ «Ամերիաբանկ»-ի շահույթն անցած տարի կազմել է 6.2 մլրդ դրամ՝ նախորդ տարվա համեմատ աճելով 50%-ով: Ըստ նրա՝ շահույթի մեծությամբ «Ամերիաբանկը» գտնվում է երկրորդ տեղում:
Գ. Թառումյանը հայտնեց, որ աճել են նաև պարտավորությունները, մասնավորապես ցպահանջը՝ 48%-ով, ակտիվներն աճել են 22%-ով, ՓՄՁ վարկավորումը՝ 12%-ով, ֆիզիկական անձանց վարկավորումը՝ 13%-ով: Այսինքն՝ ըստ նրա, մարդիկ ունեն աշխատանք և վճարունակ են: Բանկի ֆինանսական տնօրենը նկատեց, որ առաջիկայում նաև հիփոթեքային վարկավորման աճի միտում են տեսնում: Դոլարային վարկավորման տոկոսադրույքները 11-12% են՝ խոշորի համար, 14-15%՝ ՓՄՁ-ի համար: 28% աճել է հաճախորդների թիվը:
Թառումյանը հայտնեց, որ առաջիկա տարիներին կանխատեսվում է բանկային համակարգի մոտ 18-22% աճ:
«Մեկ տարում մի քանի միջազգային ճանաչման ենք արժանացել. «Եվրոմանիի» կողմից՝ «Լավագույն բանկ ՀՀ-ում», միանգամից երեք մրցանակ «Գլոբալ ֆայնենսի» կողմից՝ լավագույն բանկ, լավագույն առևտրային և լավագույն արտարժույթ տրամադրող բանկ»,- ասաց ֆինանսական տնօրենը՝ հավելելով, որ հաճախորդների սպասարկման բարելավման համար առաջիկա երկու շաբաթում կբացվի նոր՝ Սայաթ-Նովա մասնաճյուղը, ևս մեկն այս տարի կբացվի Երևանում, իսկ երկուսը՝ շրջաններում: Բանկը նաև ընդլայնում է միջազգային գործընկերների ցանկը՝ ներկայում աշխատում են ութի հետ:
Լուսանկարը՝ PanARMENIAN Photo-ի
