ՀՀ նախագահի թեկնածու Պարույր Հայրիկյանը այսօր անդրադարձել է ընդդիմադիր դաշտի եռաթեկնածուների` իր, Հրանտ Բագրատյանի և Րաֆֆի Հովհաննիսյանի համատեղ հայտարարությանը, որով կոչ են անում բոլոր քաղաքացիներին վճռականորեն մասնակցել փետրվարի 18-ի նախագահական ընտրություններին:
Նրա խոսքերով` եթե Րաֆֆի Հովհաննիսյանը և Սերժ Սարգսյանը միանան՝ մեկ փուլով կավարտվի, եթե ինքը և Սերժ Սարգսյանը միանանք՝ մեկ փուլով կավարտվի, եթե Պարույր Հայրիկյանը և Րաֆֆի Հովհաննիսյանը միանան՝ նորից մեկ փուլով կավարտվի: Նա նշեց, որ հայտարարության նախաձեռնողը եղել է Պարույր Հայրիկյանը:
Նաև ասաց, որ եթե Սերժ Սարգսյանին ուղարկած լինեին հայտարարությունը, նա ստորագրած կլիներ:
Մեկ շաբաթվա ընթացքում, նրա խոսքով, մարդկանց հսկայական հատված ազատագրվել է կաշկանդվածությունից:
Պ. Հայրիկյանը անդրադարձավ նաև իր եռօրյա չոր հացադուլին. «Դա ինձ համար աննախադեպ էր, քանի որ թեև հացադուլներ շատ եմ արել, բայց այս հացադուլը չոր հացադուլ էր, ես ասել էի՝ երեք օրով եմ անում, որովհետև ես չէի կիսում Անդրիաս Ղուկասյանի` ընտրություններին չմասնակցելու մոտեցումը, բայց ես կիսում էի նրա` ընտրություններին ընտրակաշառք չբաժանելու մտահոգությունը, և ես միացա»,- ասաց նա` հավելելով, որ այս ընթացքում Անդրիաս Ղուկասյանին այցելել է յոթ անգամ, բայց երեք օրերի ընթացքում լիովին նրա հետ է եղել: «Ի զարմանաս ինձ, միայն երրորդ գիշերն եմ վատ զգացել, ջրի սարսափելի պահանջ ունեի: Այնպես որ, իմ խոսքերի և գործերի միջև գոնե այս հարցում, կարծում եմ, հակասություն չկա»,- նշեց նա:
Այս փուլում, ըստ նրա, այնպիսի իրավիճակ է ստեղծվել, որ մի քանի անհատներից շատ բան է կախված ժողովրդի ճակատագրի համար, այդ պատճառով Պարույր Հարիկյանը շատ պատասխանատու վերաբերմունք է հանդես բերում իրավիճակին, ինքը գիտի, որ իր վարկանիշը օրեցօր աճում է և կաճի, քանի որ այն աշխատաոճը, որ իրենք են որդեգրել, և այն նյութերը, որ իրենք ունեն, անժխտելի են, մանավանդ որ, արձանագրված է ծրագրային առավելությունը. բոլորն ընդունում են, որ Հայրիկյանի ծրագրերն են ամենալավը եղել և այսօր կան:
Լուսանկարը՝ PanARMENIAN Photo-ի
