Ղազախստանի առաջին փոխվարչապետ Բաքըջան Սաղինթաևը հերքել է Ռուսաստանից ապրանքների ներկրումը սահմանափակելու երկրի մտադրության մասին տեղեկությունը: Այս մասին հայտնում է Ria Novosti-ն:
«Ոչ, այդպես չէ, մենք չենք պատրաստվում»,- լրագրողներին ասել է Սաղինթաևը:
Ռուսաստանի գյուղատնտեսության նախարար Նիկոլայ Ֆյոդորովը թյուրիմացություն է անվանել Ղազախստանում ռուսական ապրանքների ներմուծման արգելքի վերաբերյալ երկրի հետ ունեցած բանակցությունների մասին տեղեկությունը:
«Մենք ակտիվորեն ամրապնդում ենք ԵՏՄ-ն, որտեղ միասնական կանոններ են, սահմանափակումների անհնարինություն: Այնպես որ՝ ասել, որ սահմանափակումների թեմա կա, ինչ-որ թյուրիմացություն է: Դա ոչ մի կերպ չի տեղավորվում մեր երկրների ջանքերի և կառուցվածքի մեջ, ըստ որի՝ պետք է շարժվել ոչ թե ուղղակի համախմբման ուղղությամբ, այլ ստեղծել պետությունների հզոր, ուժեղ միություն»,- TASS-ը մեջբերում է նրա խոսքերը:
Միաժամանակ, «Ղազախստանի սպառողների լիգա» ասոցիացիայի ղեկավար Սվետլանա Ռոմանովսկայան ասել է. «Եթե մի շարք ռուսական ապրանքների վրա ներկրման արգելք կամ սահմանափակում դնեն, ես դեմ կլինեմ…»:
Ռոմանովսկայայի խոսքով՝ նախևառաջ պետք է հասկանալ, որ շուկան մրցակցային միջավայր է:
Փետվարի 6-ին ավելի վաղ «Կոմերսանտ»-ը, հղում անելով Ռուսաստանի գյուղատնտեսության նախարարության, Եվրասիական տնտեսական հանձնաժողովի և սննդամթերքի շուկայի աղբյուրներին, հայտնել էր, որ Ղազախստանը պատրաստվում է արգելք կամ սահմանափակումներ սահմանել Ռուսաստանից ապրանքների ներկրման վրա, քանի որ ռուբլու արժեզրկման պատճառով ղազախ արտադրողները չեն կարող գներով մրցակցել ռուսների հետ:
Պարբերականի տեղեկությամբ՝ Աստանան պահանջում է էմբարգո սահմանել Ռուսաստանից ներկրվող նավթամթերքրի, ավտոմեքենաների և դրանց համար մարտկոցների, շինարարական կցամասերի, մսի, ձվի, մակարոնի, հրուշակեղենի, ալյուրի և հյութերի վրա:
