Ոչ իշխանական ուժերի ու կազմակերպությունների համաժողովին ԲՀԿ ղեկավար Գագիկ Ծառուկյանի ունեցած ծավալուն ելույթում Հայաստանի առջև ծառացած արտաքին քաղաքական մարտահրավերների ու տարածաշրջանային խնդրիների մասին անգամ ակնարկ չկար: Փաստը, որ Ծառուկյանն ընդհանրապես շրջանցեց այս ոլորտը, «Քաղաքական և միջազգային հարաբերությունների հայկական կենտրոնի» տնօրեն Աղասի Ենոքյանի համոզմամբ՝ վկայում է այն մասին, որ Հայաստանի և́ իշխանությունները, և́ ոչ իշխանական ուժերը արտաքին քաղաքականության վերաբերյալ միևնույն մոտեցումներն ունեն, ինչի պայմաններում խոսել երկրում որակական փոփոխության մասին պարզապես հնարավոր չէ:
«Ե́վ իշխանությունները, և́ Գագիկ Ծառուկյանը ռուսական ուղեծրից դուրս եկողը չեն, իսկ սա նշանակում է, որ եթե խոսում ենք Հայաստանում փոփոխությունների և Հայաստանում ապագա ունենալու մասին, բնականաբար պետք է այդ արատավոր շղթան ջարդենք»,- «Առաջին լրատվական»-ին ասաց Աղասի Ենոքյանը:
Քաղաքագետի կարծիքով՝ Ռուսաստանը Ծառուկյանի, ՀԱԿ-ի, «Ժառանգության» և նրանց միացած մյուս քաղաքական ուժերի միջոցով ստեղծել մի «муляж», որով կարծես թե վախեցնում է Սերժ Սարգսյանին:
«Ռուսաստանն ուզում է ասել՝ տե́ս, եթե մեր ասածները չանես, ապա սրանք պատրաստ են մեր ասածը անելու, և նրանք կգան իշխանության: Ծառուկյանի ելույթը պետք է կարդալ հենց այս համատեքստում: Նա ներքին քաղաքակնության մեջ առաջարկում էր կոալիցիա կազմել, նոր մարդկանց ներգրավել, թեև շեշտադրումներն ավելի թույլ էին, քան նախկինում, երբ նա պահանջում էր ամբողջական իշխանափոխութուն»,- նշում է Աղասի Ենոքյանը և հավելում, որ Գագիկ Ծառուկյանն այժմ պարզապես ասում է, թե պատրաստ է և ուզում է լինել իշխանություն՝ զգուշացնելով, որ հակառակ դեպքում հանրահավաքներ կլինեն:
Հիշեցնենք, այսօրվա ելույթում Գագիկ Ծառուկյանը կոալիցիայի հնարավորության մասին մասնավորապես ասել էր. «Հայաստանում պետք է լինի իրական բազմակուսակցական խորհրդարան, իրական կոալիցիոն կառավարություն, լինեն իրական կոալիցիոն ավագանիներ, և ոչ մի վատ բան չկա, եթե նախագահը, վարչապետը, ԱԺ նախագահը, Երևանի քաղաքապետը, մարզպետերը լինեն տարբեր կուսակցությունների ներկայացուցիչներ կամ անկուսակցականներ»:
Աղասի Ենոքյանի կարծիքով, Գագիկ Ծառուկյանի ելույթի շեշտադրումների թուլացման պատճառը նույնպես Ռուսաստանն է: «Ռուսաստանն այլևս այս ուժերին լուրջ չի ընդունում և տեսնում է, որ այն, ինչ իրեն պետք է, կարող է կատարել Սերժ Սարգսյանի միջոցով»,-ասում է Աղասի Ենոքյանը: Ըստ քաղաքագետի՝ սրա պացույցը Գյումրիում տեղի ունեցածն ու դրա ոչ ադեկվատ պաասխանն էր Հայաստանի իշխանությունների կողմից, ինչպես նաև Բերձորի ծեծ ու ջարդը, որոնք ԲՀԿ ղեկավարը, բնականաբար, չի քննարկում, այլ իրեն հատուկ պոպուլիզմով միայն հիշատակում է Գյումրիի դեպքերն ու սահմանային լարվածությունը:
Երևանի մամուլի ակումբի նախագահ Բորիս Նավասարդյանի խոսքերով, ուզենք թե ոչ՝ երկրի ներսում փոփոխությունների օրակարգը կախված է այն արտաքին ինտեգրացիոն գործընթացներից, որոնցում այսօր ներգրավված է Հայաստանը, որովհետև այլ է բարեփոխումների հնարավորությունը ԵՏՄ շրջանակում, այլ՝ ԵՄ հետ ինտեգրման խորացման պարագայում:
«Եթե դու չես նշում, թե որ ինտեգրացիոն մոդելն ես ընտրում, չես կարող հստակ ներկայացնել երկրի ներսում բարեփոխումների ամբողջ համատեքստը, հետևաբար նաև չես կարող իրականացնել այն»,-անդրադառնալով Գագիկ Ծառուկյանի ելույթին՝ «Առաջին լրատվական»-ին ասաց Բորիս Նավասարդյանը:
Հաշվի առնելով փաստը, որ Հայաստանն այսօր ԵՏՄ անդամ է՝ ներքին բարեփոխումները, ըստ նրա, չեն կարող իրականացվել ժողովրդավարության ու թափանցիկության միջոցով, ինչը ցույց է տվել ԵՏՄ առանցքը կազմող Ռուսաստանի հետ Հայաստանի հարաբերությունների փորձը: «Այստեղ որևէ հեռանկար չկա կոռուպցիայի ու մենաշնորհների հաղթահարման առումով, իսկ եթե այդ հարցերը չեն լուծվում, մյուս հարցերի լուծման հնարավորությունը հույս չի ներշնչում»,- վստահ է Բորիս Նավասարդյանը:
Երևանի մամուլի ակումբի նախագահը ԲՀԿ ղեկավարի՝ հուժկու հանրահավքների ու անգամ արտահերթ ընտրությունների անցկացման վերաբերյալ հայտարարությունը դիտարկում է իշխանությունը վերցնելու ներքաղաքական պայքարի համատեքստում և նման հայտարարությունները բնական է համարում:
«Որքան համապետական ընտրությունները մոտենան, պայքարն այնքան սրվելու է, հետևաբար, արտահերթ ընտրությունների հարցը ոչ միայն հայտարարությամբ է դրվելու, այլև գործով է ապահովվելու՝ հնարավորինս սրելով քննադատությունը: Սա տրամաբանական է, բայց առանց ամբողջ ծավալով ռազմավարական խնդիրների լուծման ճանապարհները ներկայացնելու, առանց արտաքին գործընթացների համատեքստում դրանք դիտարկելու, այդ ամենը լուրջ չի հնչում, որքան էլ դժգոհ լինենք այսօրվա իշխանություններից»,- եզրափակում է Բորիս Նավասարդյանը:
Լուսանկարը՝ Արթուր Պապյանի թվիթերյան էջի
