McDonald’s-ի արտադրանքի ամենօրյա օգտագործումը մթագնել է ընտանեկան զույգի կյանքը. ամուսինները չեն կարողացել նորմալ շարժվել և ժամանակ հատկացնել սեփական երեխաներին: Մի օր նրանք որոշել են այլևս չօգտագործել արագ սնունդ, ինչը զարմանալի կերպարանափոխության է բերել:
Էմմա և Դիլան Սմիթները, որոնք 4 երեխա ունեն, իրենց կյանքը չեն պատկերացրել առանց McDonald’s-ի սիրելի ուտելիքների, հայտնում է fedpost.ru-ն:
«Մենք երեխաներին տանում էինք դպրոց, հետո մտնում McDonald’s, մեզ համար սնունդ և ըմպելիքներ էինք գնում: Երբեմն ես ինձ անհարմար էի զգում. հաստատության աշխատողներն անգիր գիտեին մեր պատվերները և նույնիսկ հարցեր չէին տալիս: Ես ու Դիլանը երբեք տանը չէինք պատրաստում, միրգ կամ բանջարեղեն չէինք օգտագործում, ինչը հանգեցրեց անեմիայի զարգացման»,- խոստովանում է 140 կգ քաշ ունեցած 28-ամյա Էմման:
Որոշման պատճառն այս դեպքն է եղել. «Մեր տղան դարձավ 4 տարեկան, մենք գնացինք զբոսայգի, որպեսզի ատրակցիոններով զբաղվեինք: Բայց կարուսելավարն ինձ ու ամուսնուս թույլ չտվեց տեղեր զբաղեցնել կարուսելի վրա, որովհետև անվտանգության շղթաները չէին կարող գրկել մեր շատ մեծ որովայնները: Երեխաները, որ շատ երկար էին սպասել այդ օրվան, լաց եղան և հրաժարվեցին առանց մեզ ճոճվել: Դա անհարմար և ստորացուցիչ պահ էր»,- ասում է 4 երեխաների մայրը:
«Զբոսանքը ևս չուրախացրեց երեխաներին: Ես չկարողացա ֆուտբոլ խաղալ տղաների հետ. ինձ որովայնս թույլ չէր տալիս»,- ասում է Դիլանը, որը կշռել է 108 կգ:
10 ամիս շարունակ Էմման ու Դիլանն օգտագործել են իրենց պատրաստած ուտելիքները, մրգեր ու բանջարեղեն:
Հիմա Էմման կշռում է 70 կգ, Դիլանը՝ 63:
«Մենք սկսել ենք ավելի շատ քայլել, լողով ենք զբաղվում: Մեր զարկերակային ճնշումը նորմալացել է, անհետացել են ցավերը ստորին վերջույթներում, ընդհանուր ինքնազգացողությունը ևս լավացել է: Մենք նորից գնացինք զբոսայգի և կարողացանք օգտվել բոլոր ատրակցիոններից: Այսուհետ մեր նշանաբանն է. ոչ մի համբուրգեր, միայն առողջ սնունդ և ֆիզիկական վարժություններ»,- ասում է Էմման:
