6-րդ դարի փոքրիկ գրքի էջերում գիտնականները հայտնաբերել են անհայտ Ավետարան: Տեքստը կոչվում է «Ավետարան Մարիայի ճակատագրի մասին» և ի տարբերություն այդ ժանրի այլ ստեղծագործությունների՝ այն Հիսուսի կյանքի ու գործունեության մասին չէ, այլ գուշակությունների գիրք է: Այս մասին հայտնում է Live Science-ը՝ հղում անելով Փրինսթոնի համալսարանից Աննա Մարիա Լեյենդեյքին:
Ձեռքի ափի մեծությամբ ղպտիերենով գրված գիրքը Հարվարդի համալսարանին է նվիրել Բեատրիսա Կելեկյանը՝ հնաոճ իրերի հայտնի կոլեկցիոներ Դիկրան Կելեկյանի (1868-1951թթ.) հարսը:
Երբ Լեյենդեյքը տեքստի առաջին տողում տեսել է «Ավետարան» բառը, ակնկալել է կարդալ Հիսուս Քրիստոսի մասին, սակայն պարզվել է՝ գիրքը մարգարեությունների մասին է:
Մարդկանց, որոնք ձգտել են ստանալ իրենց հուզող հարցերի պատասխանը, առաջարկվել է բացել գրքի պատահական էջ ու կարդալ «իմաստուն խոսքը»: Ձեռագրի 160 էջերում կա 37 այդպիսի խոսք:
Գուշակությունների գիրքը հենվում է կանոնիկ քրիստոնեական տեքստերի վրա, սակայն Արքայություն, Երկնային կյանք, հրաշքներ ու նմանատիպ թեմաներ չեն հիշատակվում:
Գիտնականի կարծիքով՝ գիրքն օգտագործել են Եգիպտոսում ապրող գուշակները:
