Ռուսաստանը կանգնել է նոր մարտահրավերի առաջ՝ այս անգամ սպառնում են համաշխարհային ցանցից անջատել երկրի բանկային համակարգը SWIFT կոդերից: Եթե նավթի և ռուբլու արժեզրկմամբ ստեղծված ներքին ճգնաժամին գումարվի նաև այս պատժամիջոցը, իրավիճակն ավելի կսրվի: Սա լրջագույն խնդիր է Ռուսաստանի տնտեսության համար, որովհետև երկիրը չի կարող դրսից փոխանցումներ ստանալ և փոխանցումներ կատարել:
Գաղտնիք չէ, որ Հայաստանի տնտեսությունը մեծապես կախված է դրսից, մասնավորապես՝ Ռուսաստանից եկող տրանսֆերտներից: Երբ SWIFT կոդերը Ռուսաստանի համար անջատվեն, ի՞նչ խնդիրների առաջ կկանգնի Հայաստանի տնտեսությունը: «Առաջին լրատվական»-ի հետ զրույցում այս հարցին անդրադարձավ բանկային մասնագետ Արարատ Ավագյանը:
«Հայաստանում բանկային համակարգը մի լավ օրի չէ, այս օրերին մեր բանկերը հիմնականում փոխանցումներ են իրականացնում: Եթե Արևմուտքի կողմից այս պատժամիջոցը իրականություն դառնա, խնդիրներ կառաջանան նաև մեզ համար»,-հայտնեց մասնագետը:
Նրա խոսքով՝ կոդերը Հայաստանի համար տարբեր են, սակայն լրջագույն ռիսկ կա տրանսֆերտների ծավալների կրճատման հետ կապված: 2014թ.-ի երկրորդ կեսից, ըստ Ավագյանի, իրենց բանկով Ռուսաստանից փոխանցումների ծավալները կրճատվել են մոտ 40 տոկոս, դեկտեմբերին՝ կապված տոների հետ, մի փոքր ակտիվացում է եղել, հունվարին արձանագրվում է կայուն պասիվություն:
Բանկային համակարգի մասնագետը շեշտեց, որ եթե ռուսական տնտեսությունը դրսից գումարներ չկարողանա ստանալ, ֆինանսական շարժը երկրում կդանդաղի, դա էլ շղթայաբար կազդի Հայաստանի տրանսֆերտների վրա:
«Ամենահավանական սցենարն այն է, որ որոշ ժամանակ անց մեր հայրենակիցներն այս իրավիճակում աշխատանք կկորցնեն Ռուսաստանում, Հայաստանում ռուսական կապիտալով աշխատող ընկերությունները ֆինանսական հոսքերի կրճատում կունենան: Եթե այս պատժամիջոցը գործի դրվի, իմ նշած հետևանքները մեր տնտեսության վրա իրենց երկար սպասեցնել չեն տա»,- հայտնեց Ավագյանը:
Նրա խոսքով՝ SWIFT կոդերի անջատումը Ռուսաստանի բանկային համակարգը կոլապսի կենթարկի ընդամենը մի քանի օրվա ընթացքում:
«Ռուսաստանին զրկելով այս կոդերից՝ կտրում են նրան ֆինանսական բոլոր արտաքին աղբյուրներից, այս երկիրն առևտուր ունի շատ երկրների հետ, փոխանցումների շղթան եթե կտրվի, տնտեսությունը ծանր ճգնաժամ կապրի: Ի՞նչ եք կարծում՝ օտարերկրյա կապիտալով աշխատող ընկերություններն ի՞նչ կանեն. նրանք առաջինը կարձագանքեն ստեղծված վիճակին և կլքեն Ռուսաստանը»,- նկատեց Ավագյանը՝ հավելելով, որ այն բոլոր արտոնությունները, որ Ռուսաստանը պատրաստվում էր տալ օտարերկյա ներդրողներին, միայն այս պատճառով կարող են հօդս ցնդել:
«Անելիք», «Արարատ» բանկերի փոխանցումների բաժնի աշխատակիցները մեր հարցախույզին ի պատասխան՝ հայտնեցին, որ առաջիկա երկու ամիսներին դժվար թե այս իրավիճակն ազդի տրանսֆերտների վրա և նկատելի բացասական փոփոխություն լինի բանկային համակարգի համար: Իսկ ահա մարտից հետո, երբ, որպես կանոն, փոխանցումների հոսքը դեպի բիզնեսի իրական հատված և հասարակություն մեծանում է՝ բացասական սցենարները չեն բացառվում:
