Այսօր նախընտրական քարոզարշավի շրջանակներում Մեծամորի համայնք կատարած այցելությամբ ՀՀ նախագահի թեկնածու Րաֆֆի Հովհաննիսյանը սկսել է մարզային հանդիպումների շարքը:
Թեև հանդիպումը նախատեսված էր անցկացնել Մեծամորի մշակույթի պալատում, սակայն հավաքված մարդկանց թիվն այնքան մեծ էր որ որոշվել է հանդիպումն անցկացնել բացոթյա, հանրահավաքի ձևով` մշակույթի պալատին հարող հրապարակում: Րաֆֆի Հովհաննիսյանը հանդես է եկել ելույթով՝ խիստ քննադատության ենթարկելով գործող իշխանություններին և ՀՀ նախագահի թեկնածու, գործող նախագահ Սերժ Սարգսյանին: «Եթե այսպես շարունակվի, ավելանա գործազրկությունը, խորանա աղքատությունը` Հայաստանում մարդ չի մնա. սա մի կործանարար գործընթաց է, որը պետք է միասին, ազգովի կասեցնենք փետրվարի 18-ին:»
Ապա, խոսելով համայնքային խնդիրներից նա նշեց. «Արմավիրի մարզը և, մասնավորաբար, Մեծամորի քաղաքային համայնքը լավ հնարավորություններ ունի խթանելու գյուղատնտեսական հատվածի զարգացումը, մեծացնելու գյուղմթերքների արտադրության ծավալները: “Անհրաժեշտ է սուբսիդավորել ոռոգման ջրի գինը 70-80%, որոշ դեպքերում, օրինակ` նոր հողերի յուրացման, բարձրարժեք գյուղատնտեսության վարման, նոր այգիների հիմնան դեպքում անգամ 90%: Անընդունելի է, երբ ջրառատ Հայաստանում գյուղացին չի կարողանում լիարժեքորեն օգտվել այդ բնական բարիքից և այն անօգուտ հոսում է երկրի սահմաններից դուրս:»,- շեշտել է նախագահի թեկնածուն:
Այնուհետև անդրադառնալով Մեծամորի ատոմակայանի խնդիրներին, նա նշել է, որ ատոմակայանի անձնակազմը, այդ թվում՝ տեխնիկական աշխատակիցները, պետք է հավասարապես օգտվեն վնասակար արտադրության համար նախատեսված արտոնություններից, ավելին` այդ արտոնությունները պետք է լինեն շատ ավելի բարձր, քան հիմա են:
Հովհաննիսյանը նաև հիշեցրել է, որ «Ժառանգությունն» անընդհատ պետբյուջեում առաջարկ է ներկայացնում Մեծամորի ավագ դպրոցի վերանորոգման վերաբերյալ, սակայն կառավարությունը նույն հետևողականությամբ մերժում է: Մինչդեռ, թեկնածուի, խոսքով, թե´ Մեծամորի, թե´ երկրի մյուս մարզերի դպրոցները շուտափույթ վերանորոգման և անհրաժեշտ կահավորմամբ, սարքավորումներով ու դիդակտիկ նյութերով հագեցման կարիք ունեն:
Վերջում պատասխանելով ընտրողների հարցերին, Րաֆֆի Հովհաննիսյանը նրանց կոչ է արել փետրվարի 18-ին ակտիվորեն մասնակցել նախագահի ընտրություններին և ազատ ու անկաշկանդ քվեարկել նախընտրելի թեկնածուի օգտին:
