Վանաձորի փողոցներն ու մայթերը ձյունից մաքրելու պատրվակով ամեն տարի համայնքային բյուջեից 5 մլն դրամ է հատկացվում. «Առաջին լրատվական»-ի հետ զրույցում սա հաստատեց Վանաձորի քաղաքապետարանի ֆինանսական բաժնի պետ Արթուր Սուքիասյանը:
«Որպես կանոն` աշխատանքները 5 միլիոնի շրջանակներում են, բայց նայած ձմեռ` կարող է մի տարի 2 մլն ավելի լինի, մի տարի` 2 մլն պակաս: Էդքան ծախսվում է»,- նշեց ֆինբաժնի պետը:
Հարցին` ի՞նչ փուլերով է իրականացվում այդ աշխատանքը, ֆինբաժնի պետը պատասխանեց. «Ձյունը մաքրվում է, աղադրում, ավազադրում է կատարվում, մի քիչ հալվում է, նորից է մաքրվում. մի քանի տեխնոլոգիական պրոցեսներ են կատարվում»,- ասաց Ա. Սուքիասյանը:
Բյուջեով ամեն տարի ձնամաքրման համար նախատեսված գումարը տրվում է մրցույթը շահած կապալառու կազմակերպությանը` իր կատարած աշխատանքները ներկայացնող ընթացիկ ակտերի հիման վրա: Քաղաքապետ Սամվել Դարբինյանի պաշտոնավարման օրվանից մինչ օրս` արդեն 13 տարի, Վանաձորում ձնամաքրման աշխատանքները կատարում է միևնույն` Էդմոն Էդարյանին պատկանող «Վանաձորի սանմաքրում» ԲԲԸ-ն:
«Առաջին լրատվական»-ի հետ զրույցում ընկերության ղեկավարը հաստատեց այդ տեղեկությունը: «13 տարի է` էստեղ եմ, էդ գործը ես եմ անում: Մրցակիցնե՞ր` դիմում են, ինչի՞ չեն դիմում: Եթե դեմ են, ես չեմ համապատասխանում` թող չտան: 5 մլն է նախատեսվում, բայց եթե կարիք լինում է, իրանք կարող են լրացուցիչ 20 տոկոս ավելացնել. քաղաքապետի հայեցողությամբ»,- նշեց Է. Էդարյանը:
Վանաձորում կենցաղային աղբահանությունը նույնպես Է. Էդարյանին պատկանող նշված ընկերությունն է իրականացնում, որն սկզբում սպասարկում էր ամբողջ քաղաքը, իսկ վերջին տարիներին` կենտրոնական հատվածը:
Արջուտ գյուղի վարչական տարածքում գտնվող Վանաձորի աղբավայրը, որտեղ թափվում է քաղաքի աղբը, Է. Էդարյանի սեփական տարածքն է: Աղբահանության համար այս տարի նրա հետ կնքվել է մոտ 37 մլն դրամի պայմանագիր: Ինչ վերաբերում է ձնամաքրման աշխատանքների համար կնքված 5 միլիոնի պայմանագրին, Է. Էդարյանն արդեն քաղաքապետարան ներկայացրել է այս տարվա առաջին ակտը` 590 հազար դրամ գումարի չափով: Նրա խոսքով` այդ գումարը 2 օրվա` հունվարի 8-9-ը կատարված աշխատանքների համար է:
«Քանի որ 8-ին, 9-ին կատարել եմ աղադրում և ձյունը մաքրել եմ «ջրավոզներով», տալիս են ակտի համար գումարը: 2 հատ «սպեցմեքենա» է` 130 ko 002: Որ սառույց դարձավ, էլ մենք չկարողացանք մաքրել. Մեր մեքենաների տակի մասը ռեզին է, լավ չի մաքրում, 3 հատ գրեյդեր պատվիրեցինք, պայմանագիր ունենք, կարիք եղած ժամանակ պատվիրում ենք գրեյդերներ: Ամսի 10-ից 3 օր շարունակ գրեյդերով ենք մաքրել: Աղը ինքս եմ գնում` իմ հիմնարկի փողերով, աղը իմ մոտ եմ բերում-թափում, քաղաքապետարանի կոմունալի բաժինը պատվիրում է, ասում է` աղադրում արա: Տանում ենք, աղը, թափում ենք, տեսնում ենք` ինչքան է բարձված, ինչքան ենք տալիս»,- աշխատանքների մասին է պատմում Է. Էդարյանը:
Նկատենք, որ ֆինբաժնի պետի նշած` տեխնոլոգիական պրոցեսներից ավազադրման մասին խոսք անգամ չկա: Էդարյանի ասելով` հունվարի 8-9-ին օգտագործվել է 7 տոննա աղ: Մինչդեռ ջրամաքրման մեքենաների համար ծախսված վառելանյութի վերաբերյալ տեղեկություն չի տալիս:
«Ես հիմա անգիր կարա՞մ ասեմ, պետք է մեխանիկին ասեմ` նայի, ասի: Էնտեղ ժամով ա, ժամավարձով ա, քառակուսի մետրով»,- ասում է Էդարյանը և միաժամանակ նշում. «Ես իմ գործը անում եմ, ակտը ներկայացնում եմ իրանց, իրանք իմ գումարը տալիս են: Իմ գործը որ անում եմ, 100 ձևի մարդ ա ինձ վերահսկում` կոմունալի բաժինը, կոմունալի պետը` իր աշխատողներով»:
