Ցանկացած տնտեսական ֆորումին, առավել ևս Դավոսի միջազգային համաժողովին, միշտ էլ կարելի է և պետք է մասնակցել: Նման տեսակետ «Առաջին լրատվական»-ի հետ զրույցում արտահայտեց Հայրենական ապրանք արտադրողների միության նախագահ Վազգեն Սաֆարյանը՝ սա հիմնավորելով նրանով, որ այդ ներկայացուցչական համաժողովները հնարավորություն են տալիս ուսումնասիրել տնտեսական առաջատար պետությունների ղեկավարների ելույթները, պատկերացում կազմել արդի ժամանակներում տարվող տնտեսական քաղաքականությունների մասին:
«Այսօր նրանք, ովքեր ազատ շուկայական տնտեսության ջատագովներ էին, հիմա աստիճանաբար փոխվում են: Լինում են ելույթներ, որտեղ պետության կարգավորիչ դերի մասին է խոսվում։ Համաշխարհային ճգնաժամերը, որ պարբերաբար կրկնվում են, դրա պատճառն այն է, որ պետությունները ոչ պատշաճ կարգավորում են իրենց ներքինը: Բայց հիմա, որ նայում ենք Ֆրանսիայի, Գերմանիայի տնտեսությունները, դրանցում կարգավորիչ ֆունկցիաներ կան, և այնտեղ նախարարների՝ ֆինանսների, էկոնոմիկայի նախարարների ելույթները կարող են շատ ուսանելի լինել մեզ համար՝ տնտեսական քաղաքականության մշակման հարցում»,- ասաց Վ. Սաֆարյանը՝ հավելելով, որ մեր հարևան Վրաստանն ու Ադրբեջանն էլ մասնակցում են համաժողովին, և ՀՀ-ն առավել ևս պետք է այնտեղ մասնակցեր, մեր տնտեսագիտական միտքը այնտեղ ներկայացվեր:
Հիշեցնենք, որ այսօր Դավոսում մեկնարկել է Համաշխարհային տնտեսական համաժողովը, որտին մասնակցում են աշխարհի քաղաքական և բիզնես էլիտայի ներկայացուցիչները: Հերթական հանդիպումն անցնում է «Կայուն դինամիկա» նշանաբանով:
Հայաստանն արդեն «ավանդաբար» չի մասնակցում Դավոսի միջազգային համաժողովին:
