Կանադայի իշխանությունները երկրից վտարում են Հերի Փիթերսին՝ ավստրալացի նախկին հատուկջոկատային, որը 2011թ. սեպտեմբերին Մուամար Քադաֆիի որդի Սաադի Քադաֆիին օգնել է փախչել Լիբիայից: Ինչպես հաղորդում է Lybia Herald-ը, Կանադայի բարձրաստիճան պաշտոնյաները համոզված են, որ Փիթերսը «անգնահատելի ծառայություններ է մատուցել Մուամար Քադաֆիի վարչակարգին», բացի այդ` զբաղվել է մարդկանց առևտրով:
2011թ. սեպտեմբերի 11-ին Սաադին՝ Մուամար Քադաֆիի երորրդ որդին, տեղափոխվում է Նիգերիա թիկնապահների միջոցով, որոնք ժամանել էին Կանադայից, Ավստրալիայից, Նոր Զելանդիայից, Իրաքից և Ռուսաստանից: Ի սկզբանե լիբիացին նախատեսում էր մեկնել Մեքսիկա, սակայն Նիգերիայի իշխանությունները նրան տնային կալանքի են ենթարկում:
Լիբիացի նախկին առաջնորդի ընտանիքի անդամներից մեկի փախուստի մանրամասները մամուլին ներկայացրել է հենց Հերի Փիթերսը՝ Сan/Ausе Security & Investigations International Inc կանադական թիկնապահական ընկերության ղեկավարը: Նրա խոսքերով՝ փրկելով Քադաֆիին` նա առաջնորդվել է բացառապես ընկերական զգացմունքներով:
Կանադայի սահմանապահ ծառայության գործակալության աշխատակից Քրիսթեն Սմիթի մոտ այլ կարծիք է ձևավորվել այս հարցի շուրջ: Վերջինս դատավորին ասել է, որ 2011թ. Փիթերսը 6 անգամ այցելել է Լիբիա: Նա պնդել է, որ երկու շաբաթ տևած այցի համար թիկնապահը ստացել է շուրջ 20 հազար դոլար, ավելի ուշ նրան վճարել են ևս 25 հազար դոլար: Սակայն դատարանը որոշել է, որ նախկին հատուկջոկատայինը փորձել է փրկել ընկերոջ կյանքը, և հանում է նրա դեմ ուղղված մեղադրանքները:
Այնուամենայնիվ, Հերի Փիթերսը ճանաչվում է «անցանկալի փախստական, որը մասնակից է մարդկանց մաքսանենգությանը»: Կանադայի իշխանությունների կարծիքով՝ 2004թ. Քադաֆիների ընտանիքին ցուցաբերված օգնությունը «հավասարազոր է ռազմական հանցագործություններին մասնակցելուն»:
