Բրիտանական էլեկտրոնայի հետախուզությունը՝ «Կառավարական կապի շտաբը» (ԿԿՇ) որսացել է համաշխարհային առաջատար ԶԼՄ-ների լրագրողների էլեկտրոնային հաղորդագրությունները, գրում է The Guardian-ը՝ հղում կատարելով Սնոուդենի դոսյեի նոր հրապարակված փաստաթղթերին:
«ԿԿՇ-ի զանգվածային լրտեսումը կապի միջոցների նկատմամբ ներառել է նաև Բրիտանիայի և ԱՄՆ-ի որոշ խոշոր ԶԼՄ-ների լրագրողների ստացած և ուղարկած էլեկտրոնային նամակները: Դա է ցույց տալիս Էդվարդ Սնոուդենի կողմից գաղտնազերծված փաստաթղթերի վերլուծությունը»,- գրում է թերթը:
Լրտեսման զոհ են դարձել ВВС կորպորացիան, Reuters գործակալությունը, NBC հեռուստաալիքը, The New York Times, The Washington Post, Le Monde, The Sun և The Guardian թերթերը:
«Լրագրողների նամակագրությունը հայտնվել է այն 70 հազար նամակների մեջ, որոնք ԿԿՇ-ն ստացել է 2008-ի նոյեմբեր ամսվա մեկ օրում՝ ընդամենը 10 րոպեում»,- ասվում է նյութում:
Գործակալությունը հետաքննչական լրագրողությամբ զբաղվող լրագրողներին նույնպես ռիսկային ցուցակում է նշում: Գաղտնի փաստաթղթերից մեկում ասվում է, որ «ցանկացած տիպի ԶԼՄ-ների լրագրողներն ու թղթակիցներն անվտանգության պոտենցիալ սպառնալիք են ներկայացնում»:
The Guardian-ը հիշեցրել է, որ ԶԼՄ-ների ավելի քան 100 խմբագիրներ ավելի վաղ կոչ էին արել Բրիտանիայի վարչապետ Դևիդ Քեմերոնին միջոցներ ձեռնարկել ԶԼՄ-ների աշխատակիցներին լրտեսելու դեմ:
«Բրիտանիայի կառավարությունը լուրջ ճնշման տակ է գտնվում, երբ նրանից պահանջում են լրտեսությունից պաշտպանել լրագրողների, պատգամավորների և իրավաբանների նամակագրությունները»,- նշել է պարբերականը:
