Ռեժիսոր Օլիվյե Դաանը պատասխանել է «Գրեյսը Մոնակոյից» ֆիլմի վերաբերյալ Մոնակոյի իշխան Ալբեր II-ի քննադատությանը: Այս մասին գրել է Le Journal du Dimanche հրատարակչությունը:
Ֆիլմը նվիրված է Ալբեր II-ի մորը՝ Մոնակոյի իշխանուհի և դերասանուհի Գրեյս Քելլիին: Ավելի վաղ իշխանը և նրա քույրերը հայտարարել էին, որ ֆիլմում շատ պատմական անճշտություններ կան, իսկ նրանց մոր կենսագրությունն ավելորդ ձևով զարդարված է:
Ռեժիսորն ի պատասխան հայտարարել է, որ նա ոչ թե պատմաբան է, այլ ռեժիսոր: «Ես կենսագրական ֆիլմ չեմ նկարել: Ես ատում եմ այդպիսի ֆիլմերը: Մենք ցանկացել ենք ստեղծել ժամանակակից կնոջ դիմանկարը, ով փորձում է համատեղել ընտանիքն ու աշխատանքը»,- ասել է Օլիվյե Դաանը ֆրանսիական հրատարակչությանը:
«Գրեյսը Մոնակոյից» ֆիլմը դուրս կգա 2014 թվականին: Ֆիլմում ցուցադրված է Գրեյս Քելլիի կյանքից կես տարի, երբ նա արդեն Մոնակոյի իշխանուհի էր դարձել և իր մասնակցությունն էր ունենում երկրի կյանքին: Ֆիլմի գլխավոր դերակատարը Նիկոլ Քիդմանն է:
Տեղեկացվում է, որ նկարահանումներից առաջ Ալբեր II-ի ընտանիքին ուղարկել էին ֆիլմի սցենարը: Սակայն, ինչպես բացատրել է Օլիվյա Դաանը, դա արվել է միայն ի նշան հարգանքի, այլ ոչ թե տեքստը համաձայնեցնելու նպատակով:
