«ՀայՌուսգազարդ» ընկերության կողմից գազի սակագինը սոցիալապես անապահով խավերի համար իջեցնելու սկզբունքը հետևյալն է: Աշխատանքի և սոցիալական հարցերի նախարարության կողմից կազմվում է սոցիալապես անապահով ընտանիքների ցուցակ` հիմք ընդունելով նպաստ ստանալ-չստանալու հանգամանքը:
Բոլոր այդ նպաստառուների ցուցակը ուղարկվում է «ՀայՌուսգազարդ» ընկերություն: Նրանք, ովքեր այդ ցուցակում ընդգրկված են, և նաև հանդիսանում են «ՀայՌուսգազարդի» բաժանորդներ, ամսեկան 300 խմ-ից ավելի գազ սպառելու դեպքում (օրինակ 400խմ) 300 խմ գազի համար վճարում են 100 դրամ/խմ սակագնով, իսկ մնացած գազի համար (100 խմ)` 132 դրամ/խմ սակագնով:
Ինչպես «Առաջին լրատվականի» հետ զրույցում այսօր նշեց «ՀայՌուսգազարդի» լրատվական ծառայության ղեկավար Շուշան Սարդարյանը` այդ ցուցակները դեռևս վերջնականապես ճշգրտված չեն: Նշենք, որ սկզբում խոսքը գնում էր 49 հազար բաժանորդների մասին, այնուհետև`մոտ 60 հազար բաժանորդների մասին:
Շեշտենք նաև, որ վերը նշված ցուցակում չընդգրկված սպառողները (ովքեր նպաստ չեն ստանում), եթե նույնիսկ սպառեն ամսեկան 300 խմ-ից քիչ գազ, միևնույնն է, վճարելու են 132դրամ/խմ գնով:
