Ասլան Ուսոյանի (Դեդ Հասան) հարազատները Վրաստանի իշխանություններին մեղադրել են նախօրեին Մոսկվայում սպանված «օրենքով գողի» մարմինը տեղափոխող ինքնաթիռը Թբիլիսիի օդանավակայանում չընդունելու մեջ: Այս մասին հայտնել է վրացական «Ռուսթավի-2» հեռուստաալիքը:
Ինչպես «Առաջին լրատվական»-ը տեղեկացրել է, հեռուստաընկերության տվյալներով՝ Դեդ Հասանի Թբիլիսիում գտնվող հարազատները հայտարարել են, որ հենց կառավարությունն ու անձամբ ներքին գործերի նախարար Իրակլի Գարիբաշվիլին են հրահանգել չընդունել Մոսկվայից նրա մարմինը բերող ինքնաթիռը:
Թբիլիսիի օդանավակայանի տեղեկատվության ծառայության աշխատակիցները RIANovosti-ին ասել են. «Այսօր ոչ մի նման բան տեղի չի ունեցել, մարմինը Թբիլիսի չեն բերել… մեզ ոչինչ հայտնի չէ այն մասին, որ նրան մտադիր են մեզ մոտ բերել: Մեր կողմից մերժում չի եղել: Մենք նաև չգիտենք որևէ հատուկ չվերթի մասին»:
Այնուհետև Թբիլիսիի օդանավակայանում հրաժարվել են մեկնաբանություն անել՝ հայտարարելով, որ այդ տեղեկությունը կոնֆիդենցիալ է, քանի որ կապված է հատուկ չվերթի հետ:
Ավելի վաղ ԶԼՄ-ները հայտնում էին, որ Թբիլիսիի օդանավակայանում շաբաթ գիշերը հրաժարվել են ընդունել Ուսոյանի մարմինը տեղափոխող հատուկ ինքնաթիռը, ում հարազատները ցանկանում էին հուղարկավորել Վրաստանում:
«Վզգլյադ» թերթի հաղորդմամբ՝ նախօրեին Վրաստանի գլխավոր դատախազությունից չեն հաստատել տեղեկությունը, որ Ասլան Ուսոյանի մարմինը կտեղափոխեն Թբիլիսի, սակայն չեն բացառել Վրաստանի տարածքում հուղարկավորության հնարավորությունը:
Վրաստանի ՆԳՆ-ն համարում է, որ վաղ է մեկնաբանել այն տեղեկությունները, թե Ուսոյանի հուղարկավորությունը տեղի կունենա Վրաստանում և դրան ներկա կլինեն այսպես կոչված՝ «օրենքով գողեր»:
Ուրբաթ օրը Մոսկվայի օրինապահ մարմինների աշխատակիցները հետևել են իրավիճակին Տրոյեկուրովյան գերեզմանատանը, որտեղ անցած գիշեր հանցավոր աշխարհի առաջնորդները հրաժեշտ են տվել Ուսոյանին:
Հրաժեշտն Ուսոյանին տևել է գրեթե ամբողջ գիշեր: Նրա մարմինը հարազատներին է հանձնվել անցյալ հինգշաբթի ուշ երեկոյան:
Հիշեցնենք, որ հանցավոր աշխարհի առաջնորդ Ասլան Ուսոյանը չորեքշաբթի օրը ռեստորանից դուրս գալու պահին սպանվել էր մեկ կրակոցով: Եվս երկու գնդակ դիպել էին դեպքի վայրում պատահաբար հայտնված մի կնոջ: Տուժած կինը հիվանդանոցում է:
Աղբյուրների տվյալներով՝ քիլլերը կրակել է տարբեր զենքերից, արձակվել է 7 կրակոց:
Հատուկ ծառայությունները նշում են, որ Դեդ Հասանին կարող էր սպանել նախկին հատուկ նշանակության ջոկատային կամ բիատլոնիստ-սպորստմեն: Իրավապահ մարմինների տեղեկությունների համաձայն՝ Հասանի սպանության պատճառ կարող էին լինել վրացական հանցախմբերի հետ ունեցած տարաձայնությունները:
