Samsung ընկերությունը Galaxy Note-ի արտադրությունը կհամալրի նոր՝ 8 դյույմանոց պլանշետով։ Այս մասին գրում է SamMobile բլոգը։
Պլանշետը կկոչվի Galaxy Note 8.0 կամ GT-N5100: Էկրանի թողունակությունը կլինի 1280×800: Սարքը կունենա 2 գիգաբայթ օպերատիվ, 16-32 գիգաբայթ ներքին հիշողություն և երկու տեսախցիկ՝ 5 և 1.3 պիկսելանոց:
Թե Samsung-ն ինչ պրոցեսոր կգործարկի Galaxy Note 8.0-ում, հայտնի չէ: Հունվարին CES ցուցահանդեսի ժամանակ հարավկորեական ընկերությունը ցուցադրել է 8 միջուկանոց Exynos 5 Octa չիպը, որը կարող է օգտագործվել սմարթֆոններում և պլանշետներում:
Galaxy Note 8.0-ը կկշռի մոտ 330 գրամ, կունենա 7.5 մմ հաստություն: Պլանշետը կունենա 4600 միլիամպեր/ժամ հզորությամբ մարտկոց: Սարքը կաշխատի Android 4.2-ով:
Հայտնի է, որ պլանշետը հասանելի կլինի երկու տարբերակով՝ միայն Wi-Fi-ով և Wi-Fi-ով ու բջջային մոդուլով: Կկարողանա՞ն Galaxy Note 8.0-ի տերերը դրանով զանգել՝ չի ճշգրտվում:
SamMobile-ի տվյալներով՝ Samsung-ը Galaxy Note 8.0 պլանշետը կներկայացնի փետրվարին: Հնարավոր է՝ այն ներկայացվի Mobile World Congress ցուցահանդեսի շրջանակներում, որը կբացվի Բարսելոնում փետրվարի 25-ին:
Ներկայումս Galaxy Note շարքն ընդգրկում է 3 սարք՝ 2 սմարթֆոն (մեկը՝ 5.3 դյույմանոց, մյուսը՝ 5.5 դյույմանոց էկրանով) և 10 դյույմանոց պլանշետ:
