Քիչ առաջ ավարտվեց իշխող Հանրապետական կուսակցության գործադիր մարմնի նիստը: Կուսակցության խոսնակ, Ազգային ժողովի փոխնախագահ Էդուարդ Շարմազանովը նիստից հետո տեղի ունեցած ճեպազրույցում լրագրողներին ասաց, որ քննարկվել են ներկուսակցական հարցեր:
«Առաջին լրատվական»-ի հարցին, թե ակնկալելի՞ էր, որ, բացի Հանրապետականից, մյուս խմբակցություններն էլ, բացառությամբ «Ժառանգության», կողմ կքվեարկեին ԵՏՄ համաձայնագրին, Շարմազանովը պատասխանեց. «Մենք դեռևս սեպտեմբերի 3-ին, երբ ՀՀ նախագահը Մոսկվայում խոսեց մեր պատրաստակամության, մեր որոշման մասին ՝ ՄՄ-ին միանալու, այնուհետև նաև ԵՏՄ-ին միանալու, դուք հիշում եք, թե ինչ քննադատության ալիք առաջացավ. խոսքը չի վերաբերում նրանց, ովքեր առ այսօր իրենց կարծիքին են, այլ այն քաղաքական գործիչներին, այն թիմերին, որ իրար հերթ չտալով՝ քննադատում էին նախագահի որոշումը, խոսում էին նսեմացման, արժանապատվության, վասալացման մասին: Իսկ այսօր հարյուր երեք կողմը ցույց տվեց, որ, բացի «Ժառանգություն» խմբակցությունից, Էդմոն Մարուքյանից, Նիկոլ Փաշինյանից, մնացած բոլորն իրենց քվեարկությամբ ընդունեցին, որ ՀՀ նախագահի վարած արտաքին քաղականության կուրսը ոչ միայն ընդունելի է, այլև ծափահարում են այդ քաղաքական կուրսին»:
Ըստ Շարմազանովի՝ եթե նրանք շահագրգռված էին մեր ժողովրդի ապագայով, կարծում էին, որ այդ պայմանագրին միանալը բացասական է, թող ազնիվ լինեին ներկա լինել խորհրդարանում և այն, ինչ ասում էին լրատվամիջոցներին, խորհրդարանում էլ ասեին. «Ես ընդունում եմ մարդկանց սկզբունքային որոշումը, պոպուլիզմը որևէ մեկի քաղաքական քաշը չի ավելացնում»: ՀՀԿ խոսնակը հարգում է այն բոլոր քաղաքացիներին, ովքեր ԵՏՄ պայմանագրի դեմ բողոքի ակցիա էին անցկացնում այս օրերին:
Մեր հաջորդ հարցին, թե գուցե արտաքին քաղաքականության վերաբերյալ համաձայնությունը թույլ տա իշխանություններին և իշխանափոխություն պահանջող Եռյակին համաձայնության գալ, Էդուարդ Շարմազանովը պատասխանեց. «Իրենց իրավունքն է։ ՀՀ սահմանադրությամբ՝ ցանկացած մարդ և կուսակցություն ինքն է որոշում ինչպիսի պայքար վարել, ցանկացած կուսակցության խնդիրն է իր ռազմավարությունը վարել: Երբ թիմը իշխանության մեջ չէ, պետք է նման պայքար վարի»:
Նրա խոսքերով՝ այսօր ամբողջական իշխանափոխության, պետության ղեկավարի հրաժարականի հարց գոյություն չունի. «Դրա ապացույցն է մեր գործընկերներից մեկի նախաձեռնած ստորագրահավաքը, որին միացավ երեք պատգամավոր: Ամբողջական իշպանափոխության հարցը արհեստածին հարց է»,- եզրափակեց նա:
