Վաշինգտոնը չի ձգտում ո՛չ Ռուսաստանի հետ առճակատման, ո՛չ մեկուսացման: Ria Novosti-ի հաղորդմամբ՝ այս մասին հայտարարել է ԱՄՆ պետքարտուղար Ջոն Քերին:
«ԱՄՆ-ը և այն երկրները, որոնք աջակցում են Ուկրաինայի ինքնիշխանությանը, առճակատման չեն ձգտում: Մենք Ռուսաստանին մեկուսացնելու մտադրություն չունենք՝ իր գործողությունների հետ կապված»,- Բազելում ԵԱՀԿ ԱԳՆ ղեկավարների խորհրդի նիստի ժամանակ ասել է նա:
«Ընդհակառակը՝ մենք համոզված ենք, որ Մոսկվան կարող է վերականգնել փոխհարաբերությունները և իր հանդեպ վստահությունը, եթե վերականգնի իրավիճակի հանդարտությունը և միջոցներ ձեռնարկի Մինսկի արձանագրությունը կատարելու, Ուկրաինայի արևելքում բռնությանն աջակցությանը վերջ տալու, զենքը և զինյալներին դուրս բերելու, անջատողականների վրա ազդեցությունն օգտագործելու համար»,- նշել է Քերին:
Նա հավելել է, որ «հակամարտությունը ոչ ոքի օգուտ չի բերում»:
«Մեր պետությունները չափազանց շատ ընդհանուր գործ, չափազանց շատ ընդհանուր մարտահրավերներ ունեն: Դրանք են և ահաբեկչությունը, և միջուկային զենքի տարածումը, և համաճարակային հիվանդությունները, և կլիմայի փոփոխությունը»,- նշել է Քերին:
