«Առաջին լրատվական»-ի տեղեկություններով` իշխանական վերնախավում քննարկվում է նախագահական ընտրություններից հետո կառավարության կազմի փոփոխման հարցը, այդ թվում` նաև վարչապետի: Մեր տեղեկություններով` այժմ նախագահ Սերժ Սարգսյանը փնտրտուքի մեջ է, նա վարչապետի թեկնածուների է դիտարկում, հավանական թեկնածուների մեջ է նաև ՀՀ նախկին վարչապետ Արմեն Սարգսյանը: Քննարկվում է նաև այն տարբերակը, որ հարմար թեկնածու չգտնելու դեպքում կշարունակի պաշտոնավարել գործող վարչապետ Տիգրան Սարգսյանը:
Հիշեցնենք, որ Ա. Սարգսյանը վարչապետ է եղել 1996թ. նոյեմբերից մինչև 1997թ. մարտ ամիսը: Նա վարչապետ է նշանակվել նախկին վարչապետ Հրանտ Բագրատյանից հետո, իսկ այնուհետև Հայաստանում վարչապետ է նշանակվել Ռոբերտ Քոչարյանը:
Ա. Սարգսյանն այժմ բնակվում է Անգլիայում, այնտեղ ծավալում բիզնես-գործունեություն: Անցած տարի ռուսական «Ռեգնում» և «Դելովոյ Պետերբուրգ» լրատվամիջոցներում հրապարակվեց, որ նա պատրաստվում է 30 մլրդ ռուբլի ներդնել Լենինգրադյան շրջանի ջրամատակարարման համակարգում:
«Հայաստանի նախկին վարչապետ ու Knightsbridge ընկերությունների խմբի ղեկավար Արմեն Սարգսյանը և Լենինգրադյան շրջանի ղեկավար Վալերի Սերդյուկովը հուշագիր են ստորագրել Նովոլադոգյան ջրատարի նախագծի շուրջ համագործակցության մասին, որի ընդհանուր արժեքը կազմում է 50 մլրդ ռուբլի: Շրջանը ներդրողներ էր փնտրում 4 տարի, և հայ պետական նախկին գործչի ընկերությունը միակն էր, որ համաձայնեց ներդրումներ կատարել այդ շինարարության մեջ, ինչը փորձագետները կասկածելի են համարում: … Հայկական շրջաններում առանց հպարտության պատմեցին, որ Արմեն Սարգսյանն ամենաազդեցիկ հայն է բրիտանական արքունիքում», – նշված էր հրապարակման մեջ:
Այս հրապարակումից հետո հայկական մամուլում մեկնաբանություններ հնչեցին` իսկ ինչու նա որևէ ներդրում չի կատարում Հայաստանում և ինչու է իր հսկայական ֆինանսական ռեսուրսները ներդնում միայն այլ երկրներում` մանավանդ, որ Ա. Սարգսյանը բավականին մտերիմ հարաբերությունների մեջ է Ս. Սարգսյանի հետ, իսկ վերջինս էլ արտերկրի ներդրողներին ու հատկապես սփյուռքահայերին անընդհատ հորդորում է մեր երկրում ներդրում կատարել:
Ա. Սարգսյանը միջազգային կառույցներում ունեցած իր կապերով կարողանում է օգտակար լինել նաև գործող իշխանություններին: Ասում են, որ նրան որոշակիորեն հաջողվել է մեղմել միջազգային կառույցների բացասական վերաբերմունքը Ս. Սարգսյանի նկատմամբ` կապված 2008թ. մարտի 1-ի դեպքերի հետ:
Արմեն Վարդանի Սարգսյան (ծ. 1953, հունիսի 23, Երևան), հայ քաղաքական գործիչ, Ռազմավարական հետազոտությունների միջազգային ինստիտուտի և Բրիտանական աստղագիտական ընկերության անդամ, Համահայկական ակադեմիական և գիտական ընկերության պատվավոր անդամ, ֆիզիկամաթեմատիկական գիտությունների թեկնածու։
• 1979-84-ին` ԵՊՀ Տեսական ֆիզիկայի ամբիոնի ասիստենտ,
• 1984-85-ին` Քեմբրիջի համալսարանում (Մեծ Բրիտանիա)` այցելու դասախոս,
• 1985-92-ին` ԵՊՀ Տեսական ֆիզիկայի ամբիոնի դասախոս,
• 1990-92-ին` ԵՊՀ Բարդ համակարգերի համակարգչային մոդելավորման ամբիոնի վարիչ,
• 1992-93-ին` ՀՀ Գործերի ժամանակավոր հավատարմատար, ՀՀ արտակարգ և լիազոր դեսպան Մեծ Բրիտանիայի և Հյուսիսային Իռլանդիայի Միացյալ Թագավորությունում,
• 1993-94-ին` ՀՀ Գլխավոր դեսպան Եվրոպայում, ՀՀ դեսպան` Եվրամիությունում,
• 1995-96-ին` ՀՀ դեսպան Բելգիայի Թագավորությունում, Եվրոպական համայնքների ՀՀ առաքելության դեսպան, ՀՀ դեսպան` Նիդերլանդների Թագավորությունում, ՀՀ դեսպան` Վատիկանում, ՀՀ դեսպան` Լյուքսեմբուրգի Մեծ դքսությունում,
• 1996-97-ին` ՀՀ վարչապետ,
• 1998-2000-ին` ՀՀ արտակարգ և լիազոր դեսպան Մեծ Բրիտանիայի և Հյուսիսային Իռլանդիայի Միացյալ Թագավորությունում։
