Գերմանիայի հատուկ ծառայությունները ԱՄՆ լրտեսումների մասին իմացել են դեռ 2005-ին: Այս մասին հայտնում է Spiegel ամսագիրը՝ հղում անելով գերմանական BND արտաքին հետախուզության ծառայության գաղտնի զեկույցին:
«Փաստաթուղթը հաստատում է. դեռ զրոյական թվականների կեսին արտաքին հետախուզությունը տեղեկություններ է ունեցել, որ Գերմանիան ԱՄՆ-ի համար ոչ միայն արժեքավոր գործընկեր է, այլև լրտեսության կոնկրետ թիրախ»,- գրում է պարբերականը:
Ամսագիրը նշում է, որ զեկույցը «բավական ուսանելի է նաև այն պատճառով, որ բացահայտում է 2013թ. Էդվարդ Սնոուդենի հրապարակած տեղեկատվության գործով բացատրություններն ու հավաստիացումները: Մասնավորապես, երբ ԱՄՆ հատուկ ծառայությունների նախկին աշխատակից Էդվարդ Սնոուդենը հայտնել է ԱՄՆ-ի կողմից Գերմանիային լրտեսելու մասին, Գերմանիայի կանցլերի գերատեսչության և երկրի պաշտպանության նախարարության ներկայացուցիչները հաջորդաբար հայտարարել են Գերմանիայի և ԱՄՆ-ի կառավարությունների բարեկամության, 2 երկրների իշխանությունների սերտ համագործակցության և ամուր անդրատլանտյան կապերի մասին:
Զեկույցում ասվում է, որ 2005թ. սկզբին BND-ում փորձաքննության է ենթարկվել ամերիկյան արտադրության բարձր տեխնոլոգիական տեսահսկման սարք, որը վաճառքի է հանվել Գերմանիայում: Հատուկ ծառայությունները սարքով հետաքրքրվել են, որովհետև դրանում համեմատաբար պարզ նկարագրության հետ տեղադրված է եղել չափազանց լուրջ ծրագրային ապահովում:
Փորձաքննության ընթացքում պարզվել է, որ սարքն ազդանշաններ է ուղարկում IP-հասցեին, որը կարող է պատկանել ԱՄՆ զինված ուժերին: Պարզվել է նաև, որ սարքը հնարավոր է կառավարել հեռակա, քանի որ այն նկարագրության մեջ չնշված գաղտնի գործառույթներ ունի: Ըստ BND-ի մասնագետների եզրակացության՝ Գերմանիայի քաղաքացիները, որոնք իրենց գրասենյակում այդպիսի սարք են դրել, կարող էին հայտնվել ամերիկյան հետախուզության հսկողության տակ:
Հաղորդվում է նաև, որ ամերիկյան ընկերությունը սարքը վաճառել է չհիմնավորված ցածր գնով և ձգտել է այն առաջարկել «պաշտպանական արդյունաբերության ոլորտում աշխատող, բարձր տեխնոլոգիաներով զբաղվող և ԱՄՆ ընկերությունների հետ մրցակից ընկերություններին, անվտանգության նախարարություններին, գերատեսչություններին»:
