Ճապոնիայում տեղի է ունեցել Ֆուձիսավա «խելացի քաղաքի» բացման արարողությունը՝ հայտնում է hitech.vesti.ru-ն: Քաղաքը, որը գտնվում է Տոկիոյից 1 ժամվա հեռավորության վրա, ստեղծվել է որպես ապագայի էներգաարդյունավետ, էկոլոգիական և հարմարավետ քաղաքի մոդել: Նախագիծն իրականացրել է Panasonic ընկերությունը՝ ճապոնական Mitsui & Co., Accenture, Tokyo Gas և մի շարք այլ ընկերությունների մասնակցությամբ:
Ներկայումս «Ֆուձիսավա խելացի քաղաքում» կառուցվել և վաճառվել է մոտ 100 տուն, նախագիծը հաշվարկված է 1000 ընտանիքի համար: «Սովորական» Ֆուձիսավա քաղաքի տարածքում բարձր տեխնոլոգիական բնակավայրը զբաղեցնում է 19 հա:
Նախագծի հեղինակների կարծիքով՝ «ապագայի քաղաքը» պետք է լինի, առաջին հերթին, էներգաարդյունավետ՝ լայնորեն կիրառելով էլեկտրամատակարարման այլընտրանքային աղբյուրները: Ֆուձիսավայում յուրաքանչյուր տուն ապահովված է արևային վահանակներով: Հատուկ ինտելեկտուալ համակարգը սարքերին հնարավորություն է տալիս տեղեկություն փոխանակել՝ օպտիմալացնելով էներգասպառումը:
Այդ բոլոր սարքավորումներն ապահովում է Panasonic-ը, իսկ ընկերության PanaHome ստորաբաժանումը զբաղվում է տների կառուցմամբ:
Նախագիծը, որի աշխատանքները սկսվել են 2007 թ., ըստ էության նոր է սկսվում. կառուցումը պետք է ավարտվի 2018 թ.: Բնակավայրի հեղինակները խոստանում են քաղաքի զարգացումը ծրագրելիս բոլոր հարցերում հաշվի առնել բնակիչների կարծիքը:
