Ֆրանսիական Պոլինեզիայի վեհաժողովը որոշել է Ֆրանսիայի կառավարությունից վնասի փոխհատուցում պահանջել միջուկային փորձերի անցկացման դիմաց: Ինչպես գրում է The Independent-ը, Պոլինեզիայի Պահպանողական կուսակցության կոմիտեն բնապահպանությանը հասցված վնասը գնահատում է 930 մլն դոլար:
Կոմիտեի տվյալներով՝ 1966-1996 թթ. Ֆրանսիան 210 միջուկային փորձ է իրականացրել, որոնք կործանարար ազդեցություն են ունեցել տարածաշրջանի շրջակա միջավայրի վրա:
Անցած տարի Ֆրանսիայի ՊՆ-ն գաղտնազերծել էր փաստաթղթեր, որոնցում ասվում էր, որ կղզիներում ճառագայթման մակարդակը շատ ավելի է, քան համարվում էր նախկինում: Այսպիսով՝ Թայիթի կղզում այն 500 անգամ ավելի է թույլատրելի մակարդակից:
Բնապահպանական վնասից բացի, կոմիտեն մտադիր է ևս 132 մլն դոլար առգրավելՄուրուրոա և Ֆանգատաուֆա մարջանային կղզիների շարունակվող օկուպացիայի համար, որոնք պետք է Սենատի 2012-ի հունվարի հրամանով 2014-ի հունվարի 1-ից անցնեին Պոլինեզիայի վերահսկողության տակ:
Հիշեցնենք, որ 2011-ի հուլիսին Պոլինեզիայի կառավարությունը դիմել էր Փարիզին՝ տուժածերի բուժման համար ծախսված 226 մլն եվրոյի փոխհատուցման պահանջով:
