«Վերնիսաժի գործով» առաջին դատական նիստն այսօր սկսվեց 50 րոպե ուշացումով ամբաստանյալ Վալերի Հովհաննիսյանի առողջական վիճակի վատացման պատճառով: Դատարանի կողմից շտապօգնություն էր հրավիրվել, բուժզննում էր անցել ու նոր միայն նրան բերել էին նիստին: Դատական նիստը, սակայն, դեռ չսկսված՝ ավարտվեց տուժողների բացակայության պատճառով: Դատարանը համարեց, որ առանց տուժողների՝ դատական նիստը շարունակելն աննպատակահարմար է, և որոշում կայացրեց հաջորդ դատական նիստին բերման ենթարկել տուժող Մնացական Սուքիասյանին, որն այս նիստին էլ պատշաճ ծանուցված էր, բայց չէր ներկայացել:
Ուշագրավ է, որ ԲՀԿ-ական պատգամավոր Կարո Կարապետյանի (Յուվեցի Կարո) փեսան դատարանի դահլիճ մտավ բավականին պայծառ տրամադրությամբ և ողջունեց նիստերի դահլիճում իրեն սատարելու եկած տղաներին:
Ինչ վերաբերում է Վալերի Հովհաննիսյնաին, ապա և՛ նրա պաշտպանը՝ Արայիկ Ալվանդյանը, և՛ մայրը՝ Լիա Հովհաննիսյանը, և՛ հայրը խուսափեցին լրագրողների հարցերից: Երբ փորձեցինք մորից ինչ-որ բան ճշտել որդու առողջական վիճակի մասին, նա կցկտուր ինչ-որ բառեր ասաց, ապա ամուսինը հեռացրեց նրան տեսախցիկներից:
Հիշեցնենք, սակայն, որ ամիսներ շարունակ տիկին Լիան բողոքի ակցիաներ էր անում կառավարության և դատարանների առաջ՝ պահանջելով արդարություն: Նա հայտարարում էր, որ Յուվեցի Կարոն սպառնում ու հետապնդում է իրենց, գումար է առաջարկում, բայց հիմա տիկինն անգամ որդու առողջական վիճակի մասին չի ցանկանում խոսել:
Ինչ վերաբերում է նրա փաստաբանին, ապա նա փորձում էր իր պաշտպանյալի վիրահատության անհրաժեշտության մասին միջնորդություն ներկայացնել դատարանին, երբ արդեն դատական նիստը հայտարարվել էր փակված: Բացի դրանից՝ նա անգամ տեղյակ չէր, թե ինչ վիրահատության պետք է ենթարկվի իր պաշտպանյալը: «Ես հո բժիշկ չե՞մ»,- ի պատասխան լրագրողների հարցին՝ հայտարարեց փաստաբանն ու հեռացավ:
Առավել մանրամասն՝ տեսանյութում:
