Մերձավոր Արևելքում ուժեղ սառնամանիքների և եղանակային վատ պայմանների հետևանքով զոհվել է 8 մարդ, հաղորդում է Associated Press-ը: Տարածաշրջանում հունվարի 2-ից ձնամրրիկ և ուժեղ սառնամանիքներ են սկսվել: Մի քանի օրում տեղացել է շուրջ 70 սմ ձյուն, ինչից հետո սկսվել են սաստիկ ցրտեր, որոնք ուղեկցվւմ են 70 կմ-ժամ արագությամբ քամիներով: Օդերևութաբանների տվյալներով՝ նման երևույթներ տարածաշրջանում չեն նկատվել արդեն ավելի քան 30 տարի:
Կարմիր խաչի ներկայացուցիչների տվյալներով՝ Լիբանանում առատ ձյունը և սաստիկ ցուրտը հանգեցրել են 6 մարդու մահվան: Պաղեստինի Ռամալլահ քաղաքում ավտոճանապարհային պատահարի զոհ են դարձել երկու մարդ: Բացի այդ, եղանակային պայմանները հանգեցրել են Ռամալլահի շուրջ 5000 տնտեսություններում էլեկտրականության անջատմանը:
Հաղորդվում է, որ սառնամանիքների պատճառով զանգվածաբար տարհանվել են սիրիացի փախստականները:
Երուսաղեմում իշխանությունները ստիպված են եղել փակել դպրոցներն ու մանկապարտեզները: Քաղաքի մի շարք թաղամասերում երթևեկությունը կաթվածահար է եղել:
