«Չաո բամբինո» մանկական սրճարանի տնօրինության խոսքով՝ երեկ երեկոյան իրենց սրճարանում փուչիկների պայթյունից բռնկված հրդեհի մեղավորությունը «Փուչիկների աշխարհ» ընկերությանն է: Մանկական սրճարանը փուչիկներ ձեռք է բերում հենց այդ լիցենզավորված ընկերությունից, և իրենք հնարավորություն չունեն ստուգելու, թե ինչով են լիցքավորված փուչիկները: «Մեր սրճարանն արդեն 2.5 տարի է՝ աշխատում է, և նման դեպք չի եղել: Մենք պատվիրում ենք, իրենք բերում են այդ փուչիկները, որոնք պետք է լիցքավորված լինեն հելիումով: Իսկ թե այս անգամ ինչով են լիցքավորված եղել, մենք չգիտենք և փորձում ենք պարզել»,- «Առաջին լրատվական»-ի հետ զրույցում ասաց սրճարանի տնօրեն Գրիշա Հարությունյանը՝ հավելելով, որ իրենք հետևողական են լինելու, որ «Փուչիկների աշխարհը» պատասխանատվության ենթարկվի անթույլատրելի գազով լիցքավորված փուչիկներ տրամադրելու համար:
Տնօրենի խոսքով՝ դեպքը տեղի է ունեցել ծննդյան տոնակատարության տորթը կտրելու ժամանակահատվածում: Երեխաները աթոռներին կապված փուչիկներն արձակելով մոտեցել են տորթին, որի վրա տեղադրված հրավառությունից փուչիկները պայթել են և բոց է առաջացել: «Ընդամենը թույլ բոց է եղել, որից ո՛չ տարածքն է այրվել, ո՛չ սեղանը, ոչ մի բան: Երեխան մաշկային խնդիր է ունեցել, բոցից հետո մի քիչ այտուցներ են եղել: Մենք օգնություն ենք ցույց տվել, բոլորը հանգստացել են ու դեպքից երկու ժամ հետո նոր հյուրերը մեզանից շատ գոհ գնացել են»,- հավելեց տնօրենը:
Նշենք, որ այրվածք ստացած երեխաների ծնողները դժգոհել էին, թե սրճարանի տնօրինությունն անտարբերություն է ցուցաբերել, ծնողներն են շտապօգնություն կանչել և երեխաներին տեղափոխել հիվանդանոց, որտեղից էլ նրանց նույն օրը դուրս են գրել:
Սրճարանի տնօրինության խոսքով, սակայն, շտապօգնություն չի եկել սրճարան: «Բալիկին այդքան բան չէր եղել, որ շտապօգնություն կանչեին: Մենք ամբղջ կոլելտիվով իրենց կողքին ենք եղել, օգնություն ենք ցուցաբերել, որից հետո ծնունդը 1-2 ժամ շարունակվել է, շոու ծրագիրը շարունակվել է, ու դրանից հետո նոր միայն իրենք հեռացել են շատ գոհ: Ես չեմ կարծում, որ եթե երեխային վնաս եղած լիներ, ինչ-որ մի ծնող 2 ժամ կմնար ու կշարունաեր ծնունդը»,- ասաց սրճարանի մեկ այլ աշխատակից:
Տնօրինությունը տեղեկացրեց, որ արդեն իսկ հանձնարարական է տրված սրճարանի աշխատակիցներին՝ արգելել անգամ հյուրերի հետ բերված փուչիկները ներս թողնել: «Իսկ մեզ մոտ լինելու են միայն օդով լցված փուչիկներ: Այսուհետ գրություն կփակցվի սրճարանի մուտքին, որ փուչիկներ ներս բերել ևս արգելվում է: Թող օդով լիցքավորված փուչիկներ լինեն, քանի որ երեխաներ են, պետք է զգուշանալ»,- ասաց Հարությունյանը:
«Առաջին լրատվական»-ը փորձեց զրուցել նաև «Փուչիկների աշխարհ» ՍՊԸ-ի ներկայացոցիչների հետ, սակայն նրանց այցեքարտի վրա նշված հեռախոսահամարներով պատասխանում էր մի երիտասարդ՝ հայտարարելով, որ ինքը շատ զբաղված է, այդ համարները «Փուչիկների աշխարհի» հետ կապ չունեն:
