Իրանում շաբաթ օրը՝ հունվարի 5-ին, «Բուշեհր» ԱԷԿ-ը միացվել է էներգահամակարգին: Այդ մասին այսօր հայտնել է Իրանի Իսլամական Հանրապետության Ատոմային էներգիայի կազմակերպության ղեկավար Ֆերեյդուն Աբասի Դավանին՝ փոխանցում է ITAR-TASS-ը:
Նրա խոսքով՝ «Բուշեհր» ատոմակայանն աշխատում է իր հնարավորությունների 100 տոկոսի չափով:
Իրանում և մերձավորարևելյան տարածաշրջանում առաջին ատոմակայանի շինարարությունը սկսվել է 1975 թվականին՝ գերմանական Siemens ընկերության մասնաճյուղի՝ Kraftwerk Union AG ֆիրմայի կողմից: Սակայն Իրանում 1979 թվականի փետրվարին տեղի ունեցած իսլամական հեղափոխության և դրանից անմիջապես հետո սկսված իրանա-իրաքյան պատերազմի հետևանքով շինարարական աշխատանքները դադարեցվեցին, համաձայնագիրը՝ նույնպես:
Ատոմակայանի շինարարությունը վերսկսվել է ռուսական կողմի հետ 1995-ին կնքված պայմանագրով:
