Քաղաքագետ Անդրիաս Ղուկասյանի կարծիքով՝ եթե Գագիկ Ծառուկյանի ռեսուրսների 10 տոկոսը մեկ այլ քաղաքական ուժ ունենար, վաղուց Հայաստանում իշխանափոխությունը կատարված կլիներ: «Առաջին լրատվական»-ի հետ զրույցում նման տեսակետ հայտնեց նա՝ հավելելով, որ ԲՀԿ-ն այսօր ունի իշխանափոխության բոլոր անհրաժեշտ ռեսուրսներն ու գործիքները:
«Թե դա ինչ կլինի՝ հեղափոխություն, համակարգափոխություն՝ դա արդեն դիսկուսիայի խնդիր է: Տարբեր տեսակետներ կան՝ իշխանափոխությունը դեռ համակարգափոխություն չէ, հեղափոխություն չէ… դա մեկ այլ գործընթաց է»,-ասաց նա:
Հետաքրքրվեցինք, թե համաձա՞յն է այն տեսակետի հետ, որ Տեր-Պետրոսյանը Գագիկ Ծառուկյանին օծեց ընդդիմության առաջնորդ, և ընտրություններին հենց Ծառուկյանը կառաջադրվի որպես նախագահի թեկնածու. «Այո՛, իմ կարծիքով՝ դա պարզ ձևով մատուցած է հանրությանը, բայց վերջին խոսքը դեռ հստակ ասված չէ՝ Գագիկ Ծառուկյանը պատրա՞ստ է որպես նախագահի թեկնածու հանդես գալ, թե՞ ոչ: Նա ասել է՝ եթե պայմանները լինեն, կառաջադրվի, բայց այդ հարցում հստակություն չկա: Այդ հարցի հստակությունը կապված է նաև Ռոբերտ Քոչարյանի գործոնի հետ:
Այն պահին, երբ Գագիկ Ծառուկյանը հայտարարի, որ ինքն է ԲՀԿ թեկնածուն, կավարտվի Ռոբերտ Քոչարյանի քաղաքական կարիերան, Ռոբերտ Քոչարյանը կզրկվի հետդարձի բոլոր պոտենցիալ հնարավորություններից»:
Հարցազրույցն ամբողջությամբ՝ մեր տեսանյութում:
