Շատ կարևոր է, որ Վրաստանը, Ուկրաինան և Մոլդովան կարողանան օրինակ ծառայել Հայաստանին: «Առաջին լրատվական»-ի հետ զրույցում այս մասին ասաց ԵՄ ԱլԳ Քաղաքացիական հասարակության ֆորումի Հայաստանի ազգային պլատֆորմի համակարգող Բորիս Նավասարդյանը՝ անդրադառնալով Վրաստանում սկսված քաղաքական ճգնաժամին:
Նա հիշեցրեց, որ «Վրացական երազանք»-ը ձևավորվել էր այն ուժերի մասնակցությամբ, որոնք դեմ էին Սաակաշվիլիի վարած քաղաքականությանը ներքին և որոշ արտաքին հարցերում, չունեին ընդհանուր գաղափարախոսական և քաղաքական հիմք, պարզապես մեծ դերակատարություն ունեցավ Իվանիշվիլիի անձի կշիռը վրացական ներքին քաղաքական կյանքում: Իսկ այսօր, նրա խոսքով, Իվանիշվիլիի գործոնը պաշտոնական մակարդակով արդեն ուժի մեջ չէ, նա ակտիվ, հանրային քաղաքականության մեջ չէ, ուստի այդ ուժերին միմյանց կապող գործոնը կամաց-կամաց դադարում է աշխատել, ինչի արդյունքում առանձին խմբավորումներ, որոնք միացել էին «Վրացական երազանք»-ին, այսօր ունենում են հակասություններ: Ալասանիայի թիմը կարծում է, որ պետք է հստակ դիրքորոշումներ ունենալ որոշ հարցերում, որտեղ նաև երևում են հակասություններ այն մարդկանց հետ, ովքեր որպես կուսակցություն դաշինքում ներկայացված չեն:
Ինչ վերաբերում է Մոսկվայի և Մոսկվայի կողմից տարածաշրջանի ասոցացումը Եվրոպայի հետ փակելու փորձերին, մեր զրուցակիցն ասաց, որ այդ գործոնը նորություն չէ, այն միշտ աշխատել է:
«Ռուսաստանը, բնականաբար, փորձում է օգտագործել այն հակասությունները և անորոշությունները, որոնք կան «Վրացական երազանքի» ներսում, որոնք իրենց ուղղակի քաղաքական արդյունքները կտային՝ նույնիսկ անկախ Մոսկվայից: Այնպես որ՝ ես չէի համարի, որ այս պարագայում հիմնական դերակատարը Մոսկվան է. պատճառները ավելի շատ ներքին են: Բայց ներքին հակասությունների վրա արտաքին ուժերը սկսում են աշխատել»,- ասաց նա՝ հավելելով, որ ներկայիս զարգացումները կարող են խոչընդոտել Վրաստանի եվրաինտեգրացիային և ատլանտյան ինտեգրացիային: Նրա համոզմամբ՝ այդ վեկտորը լուրջ մարտահրավերներ ունի և պահանջում է ավելի մեծ մեծամասնություն, քան այսօր Վրաստանն ունի:
Նա նշեց, որ տարածաշրջանի համար շատ կարևոր է, որպեսզի այն երկրները՝ Վրաստանը, Ուկրաինան, Մոլդովան, որոնք գնում են ասոցացման ճանապարհով, կարողանան օրինակ ծառայել, քանի որ ցանկացած խանգարող հանգամանք, միասնության ցանկացած բացակայություն, իրավիճակի ցակացած սրում, որ մենք այսօր նկատում ենք Ուկրաինայում և ինչ-որ չափով էլ՝ Վրաստանում, Հայաստանում լրացուցիչ փաստարկ է տալիս այն շրջանակներին, որոնք կողմնակից չէին հետևելու Արևելյան գործընկերության այն երեք երկրների օրինակներին, որոնք ասոցացման ճանապարհով գնացին:
«Այսօր նաև շատ կարևոր է, թե ինչպես կավարտվեն ընտրությունները նոյեմբերի վերջին Մոլդովայում: Դա երկրորդ երկիրն է, որտեղ իրավիճակը միանշանակ չէ: Եթե մենք բոլոր այդ երեք երկրներում տեսնենք խնդիրներ, բնականաբար՝ Հայաստանի ներքին բանավեճի համատեքստում լրացուցիչ փաստարկներ ու հիմնավորումներ կստանան ոչ եվրոպական զարգացման կողմնակիցները»,- նշեց Բորիս Նավասարդյանը:
