Վերջերս ձերբակալված ոստիկանության քրեական հետախուզության գլխավոր վարչության նախկին պետ Հովիկ Թամամյանը ժամանակին խոստովանել էր, որ ինքն է ղեկավարել Ազատության հրապարակում մարտի 1-ին կատարված հայտնի դեպքերը:
Նույն Թամամյանն էր 2003-2004թթ. ջարդուփշուր անում ընդդիմադիր կուսակցությունների գրասենյակները: Այսինքն` նա մշտապես ծառայել է ռեժիմին: ՍԴՀԿ անդամ, ԱԱ նախկին փոխնախարար Գուրգեն Եղիազարյանին հարցրինք` ինչո՞ւ է ռեժիմը նրան ձերբակալում, արդյոք չե՞ն վախենում, որ Թամամյանը մի օր էլ խոսի կատարածների մասին:
«Իշխանությունները նախապես հաշվել են, որ Թամամյանը երբեք ավելորդ ցուցմունքներ չի տա: Ավելին` նրա համար միշտ հոդվածներ կպահեն, որոնցով կարող են նրան ցմահ ազատազրկման դատապարտել: Ուստի հիմա նա բանտախցում կմտածի` անդրադառնա՞լ այդ հարցերին և ցմահ ազատազրկման դատապարտվել, թե՞ չանդրադառնալ ու գլուխն ազատել` 10 տարի նստելով: Ավելին` նա գիտի, որ հետո, երբ կրկին ձեռնտու լինի իշխանություններին, իրեն դուրս կհանեն: Ուստի, էլ ինչու հիմիկվանից խոսի Մարտի 1-ի մասին»,- «Առաջին լրատվականի» հետ զրույցում ասաց Գուրգեն Եղիազարյանը:
