Հայաստանի Կենտրոնական ընտրական հանձնաժողովն այսօր` հունվարի 4-ին, ժամը 18:00-ին, ավարտել է ՀՀ նախագահի թեկնածուների առաջադրման փաստաթղթերի ընդունումը:
ԿԸՀ մամլո քարտուղար Հերմինե Հարությունյանը «Առաջին լրատվական»-ին հայտնեց, որ գրավի վճարման անդորրագրերը ԿԸՀ ներկայացրել են միայն յոթ թեկնածուներ: Նրանք են` ՀՀ նախագահ, իշխող Հանրապետական կուսակցության առաջնորդ Սերժ Սարգսյանը, «Ազատություն» կուսակցության ղեկավար Հրանտ Բագրատյանը, «Ժառանգություն» կուսակցության առաջնորդ Րաֆֆի Հովհաննիսյանը, «Ազգային ինքնորոշում» միավորման նախագահ Պարույր Հայրիկյանը, Լեռնային Ղարաբաղի նախկին արտգործնախարար Արման Մելիքյանը, «Ռադիո հայ» ՍՊԸ-ի տնօրեն Անդրիաս Ղուկասյանը և էպոսագետ, անկուսակցական Վարդան Սեդրակյանը:
Հ.Հարությունյանը նաև նշեց, որ մյուս թեկնածուներին ԿԸՀ որոշմամբ, օրենքի համապատասխան, կտրվի 48 ժամ՝ փաստաթղթերը ամբողջացնելու համար:
Դեռևս գրավ չվճարած թեկնածուներն են` անկուսակցական, կարատեիստ Տարոն Աբրահամյանը, անկուսակցական գործազուրկ Ռոբերտ Ահարոնյանը, Մարդու իրավունքների Եվրադատարանի փաստաբան Ռուբեն Այվազյանը, անկուսակցական գործազուրկ Մհեր Հայրապետյանը, «Ազգային համաձայնություն» կուսակցության ղեկավար Արամ Հարությունյանը, Մամուլի ազգային ակումբի տնօրեն Նարինե Մկրտչյանը, անկուսակցական թոշակառու Պավլիկ Սարգսյանը, «Քաշաթաղ» հասարակական կազմակերպության ղեկավար Ռոբերտ Սիմոնյանը:
Նշենք, որ գրանցումը կկատարվի հունվարի 4-ից մինչև հունվարի 14-ի ժամը 18-ն ընկած ժամանակահատվածում:
