RT ալիքի SophieCo ծրագրի թողարկմանը ամերիկացի գործարար Ռիկ Թամլինսոնը պատմել է, որ երկրային էներգակիրների մասին շուտով հնարավոր կլինի մոռանալ:
Թամլինսոնը Deep Space Industries ընկերության հիմնադիրներից է, որի նպատակը տիեզերքի նվաճման հիման վրա գումար վաստակելն է: Այդ նպատակով գործարարները մտադիր են ուղեծրային էներգետիկ կայան ստեղծել, որտեղ հրթիռները կարող են լիցքավորվել, իսկ հեռանկարում Արեգակնային համակարգի այլ մոլորակների գաղութացումն է, աստերոիդների վրա բնական ռեսուրսների արդյունահանումը և այնտեղ տիեզերական նավերի համար վառելիքի արտադրությունը:
«Երկրի վրա գտնվող բոլոր ռեսուրսներից կան նաև Տիեզերքում: Իրականում Երկիրը մի քանի աստերոիդներից է կազմված, որոնք ժամանակի ընթացքում միացել են: Հաշվի առնելով այն հանգամանքը, որ որոշ ընկերություններ պատրաստվում են տիեզերք դուրս գալ, մենք ցանկանում ենք այդ ռեսուրսների արդյունահանում կազմակերպել և լիցքավորման կայաններ կառուցել»,- պատմել է Թամլինսոնը:
Նրա խոսքերով՝ ընկերության արտադրանքի մեծ մասը նախատեսված կլինի հենց տիեզերքում օգտագործելու համար:
«Հայտնի է, որ շատ աստերոիդների վրա սառույց կա, որը ջրի պինդ վիճակն է: Իսկ եթե ջուր կա, ապա օդ էլ կա, իսկ դա նշանակում է, որ կա այն ամենը, ինչից ստեղծվում է հրթիռային վառելիքը, կարելի է ասել՝ հրթիռների բենզին: Մտածեք, հրթիռների համար տիեզերք վառելիք հասցնելը չափազանց թանկ է: Սակայն եթե մենք հենց տիեզերքում վառելիք արտադրենք, ապա կարող ենք հենց այնտեղ էլ վաճառել այն և համոզված ենք, որ գնորդ կգտնվի: Մենք հուսով ենք գումար վաստակել դրանով»,- համոզված է գործարարը:
