Երկրի արբանյակի ուղեծիր Չինաստանի ուղարկած տիեզերական սարքը շաբաթ օրը հաջող վայրէջք է կատարել Չինաստանի հյուսիսային Ներքին Մոնղոլիա ինքնավար շրջանի տարածքում: Այս մասին հայտնում է «Սինհուա» գործակալությունը:
Դա վերջին 40 տարում առաջին անգամ վերադարձող տիեզերական սարքի ուղարկումն էր. այդպիսի վերջին փաստաթղթավորված գործողություն իրականացրել է Խորհրդային Միությունը 1970-ական թվականներին:
Իր 8-օրյա առաքելության ընթացքում սարքն անցել է 840 հազար կմ տարածություն, թռչել է Լուսնի շուրջը և վերադարձել Երկիր մոտ 11 կմ/վ արագությամբ: Այդպիսով՝ Չինաստանը դարձել է երրորդ երկիրը՝ ԽՍՀՄ-ից և ԱՄՆ-ից հետո, որ Լուսին է արձակել վերադարձող սարք:
Փորձարարական սարքի արձակումը Չինաստանի կողմից Լուսնի զոնդավորման «Չանյե» ծրագրի իրականացման հերթական քայլն էր: Ծրագիրն ընդգրկում է 3 փուլ՝ թռիչք Երկրի արբանյակի շուրջը («Չանյե-1» և «Չանյե-2»), վայրէջք Լուսնի վրա («Չանյե-3» և «Չանյե-4») և Լուսնից Երկիր վերադարձ («Չանյե-5» և «Չանյե-6»): Արձակված սարքը պետք է փորձարկեր տեխնոլոգիաները, որոնք կօգտագործվեն «Չանյե-5»-ի համար:
Չինացի գիտնականներն արդեն սկսել են ծրագրի երրորդ փուլի իրագործումը: Չինաստանը ծրագրում է 2017թ. «Վենչան» տիեզերակայանից «Չանյե-5» արբանյակ արձակել, որի առաքելությունն է Լուսին վայրէջքը, լուսնային գրունտի նմուշների հավաքումն ու վերադարձը Երկիր:
