«Հրապարակ» թերթը գրում է. «Հովիկ Աբրահամյանի կառավարությունը ոչ մի կերպ չի կայունանում՝ կամ ինքն է սրան-նրան պաշտոնից ազատում, կամ իրենք են ազատվում: Ամենաբարդն էկոնոմիկայի նախարարության վիճակն է: Նախարար Կարեն Ճշմարիտյանի ու տեղակալներից մեկի՝ Տիգրան Հարությունյանի փոխհարաբերությունները լարվել են այն աստիճան, որ Ճշմարիտյանն ասել է՝ դիմում գրի-գնա: Հարությունյանն էլ դիմումը գրել է դեռևս սեպտեմբերի 3-ին, սակայն վարչապետ Հովիկ Աբրահամյանը չի ստորագրում: Չի բացառվում, որ Հովիկ Աբրահամյանի չստորագրելն էլ պայմանավորված է իր ու Կարեն Ճշմարիտյանի միջև հարաբերությունների խաթարմամբ: Տևական ժամանակ է, ինչ խոսվում է, որ նրանք միմյանց հետ լավ չեն, անգամ, ասում են՝ մոտ է Ճշմարիտյանին «դիմում գրի-գնա» ասելու պահը: Տիգրան Հարությունյանին ազատելու պատճառների մասին էլ տարբեր լուրեր են շրջանառվում, մի մասը՝ թե նրա աշխատանքից դժգոհ են եղել, որոշներն էլ՝ թե հիմնական խնդիրը նրա՝ Տիգրան Սարգսյանի կադրերից լինելն է: Ոմանք էլ ավելի հավանական են համարում, որ Ճշմարիտյանն ամեն գնով փորձում է լուծել Խոսրով Հարությունյանի որդուն՝ Զարգացման հայկական գործակալության տնօրեն Ռոբերտ Հարությունյանին պաշտոնի նշանակելու հարցը, ում Ճշմարիտյանը վաղուց է մտադրվել նախարարություն տեղափոխել: ԱԺ վերջին հարցուպատասխանի ժամանակ Կարեն Ճշմարիտյանը խոսեց երեք կառույցների՝ Զարգացման հայկական գործակալության, Արդյունաբերության աջակցության և Մրցունակության հիմնադրամների միացման մասին: Այժմ կառավարությունում քննարկվում է այդ հարցը:
Էկոնոմիկայի փոխնախարար Տիգրան Հարությունյանն ակտիվ մասնակցություն է ունեցել ԵՏՄ ինտեգրացիոն գործընթացներում: Եղել է ՄՄ ճանապարհային քարտեզի երկու ուղղությունների ոչ սակագնային կարգավորման և արդյունաբերական քաղաքականության աշխատանքային խմբերի ղեկավարը: Նա երեկ մեզ հետ զրույցում հավաստիացնում էր, թե ինքն է որոշել դիմում գրել, իսկ Մաքսային միությանն անդամագրվելու գործընթացներում իր կատարած աշխատանքն անթերի է եղել. «Ես իմ գործը շատ լավ եմ կատարել ու 5 ու խաչ եմ ստացել»: Մեր հարցին, թե ով է նշանակել այդ գնահատականը, պարզաբանեց. «5 ու խաչը դրել է նախագահը, որ առանց պրոբլեմների ստորագրել է Մաքսային միությանը միացման հարցը, այսինքն՝ անձամբ չի դրել: Ես երկու ոլորտով կուրատոր եմ՝ ոչ սակագնային կարգավորման և արդյունաբերական քաղաքականության, և այդ երկու մասով, որ ես եմ ղեկավարել, ճանապարհային քարտեզը կատարել ենք ժամկետներում ու անթերի: Դրա համար ոչ մի կոնֆլիկտի, դժգոհության մասին խոսք լինել չի կարող»: Այդ դեպքում ի՞նչն է եղել դիմում գրելու պատճառը: «Ես այդ ճանապարհն անցել եմ, երևի արդեն հետաքրքիր չէ, նոր տեղի առաջարկ էլ դեռ չեմ ստացել»: Ինչ վերաբերում է Խոսրով Հարությունյանի տղայով իրեն փոխարինելուն, ասաց, որ նման տեղեկություն չունի. «Եթե ասում են, ուրեմն, նման բան կա»: Գուցե Խոսրով Հարությունյանի որդուն նշանակելու ցանկությա՞մբ է պայմանավորված իր գնալու անհրաժեշտությունը:
Մանրամասները՝ թերթի այսօրվա համարում
Լուսանկարը` PanARMENIAN Photo-ի
