Forbes ամսագրի մերձավորարևելյան տարբերակը արբանյակային Al Arabiya հեռուստաալիքը ճանաչել է արաբական աշխարհի ամենազդեցիկ հեռուստաալիքը ինտերնետ տարածքում: Այս մասին հայտնում է alarabiya.net-ը:
Արաբական հայտնի հեռուստաալիքների պարգևատրման արարողությունը տեղի է ունեցել Դուբայում՝ Forbes Middle East-ի գլխավոր հրատարակիչ Նասեր բեն Ակիլ Թայարի, գլխավոր խմբագիրների և արաբական հեռուստաալիքների տնօրենների մասնակցությամբ:
2012-ին հեռուստաալիքի տեղեկատվական պորտալն ունեցել է 306 մլն այցելություն, իսկ մշտական նոր այցելուների թիվն ավելացել է ավելի քան 21 տոկոսով:
Վարկանիշի երկրորդ տեղում Al Jazeera-ն է: Նրա կայք է այցելել 277 միլիոնից ավելի մարդ: Երրորդ տեղում Rusiya Al-Yaum ռուսական հեռուստաալիքի արաբական տարբերակն է՝ անցնող տարում 50 մլն դիտմամբ:
Նշենք, որ Al Arabiya-ն աջակիցների մեծ բանակ ունի նաև Facebook և Twitter սոցցանցերում: Հեռուստաալիքի կայքը հավանության է արժանացրել Facebook-ի 2.5 մլն և Twitter-ի ավելի քան 5 մլն օգտատեր:
Առաջին անգամ չէ, որ Al Arabiya-ն ճանաչվում է արաբական աշխարհի ազդեցիկ լրատվական աղբյուր: Այս տարի ալիքն արժանացել է միջազգային նորությունների անաչառ լուսաբանման ՄԱԿ-ի հատուկ մրցանակին:
